Saulogon karong adlawa ang ika-22 nga kasumaran sa People Power 1 nga nahitabo niadtong Pebrero 24, 1986 sa Epifanio delos Santos Avenue (Edsa) nga maoy nakapalagpot sa diktadoriyang rehimen ni anhing Pres. Ferdinand Marcos.
Sa pagpuli ni kanhi Pres. Corazon Aquino sa pamunoan sa Pilipinas, daghan ang nalipay nga nausab ang kisdom nga hulagway sa nasud ug ang mga tawo nakabaton og kagawasan nga gihikaw gikan kanila sulod sa 20 ka tuig nga rehimen ni Marcos.
Dungan niadto ang mga paglaum nga dili na mahiaguman pa ang ingon ka luog nga panggobiyerno ni Marcos. Sukad niadto, nahigmata ang mga Pilipino – gikan sa yanong lumolupyo ngadto na sa mga tag-as nga sector sa komunidad – batok sa dautang sistema sa pang-gobiyerno.
Nagtuo ang kadaghanan nga maghatag og dakong kausaban sa mga kawatan sa gobiyerno ang Edsa revolution niadtong 1986. Apan nahulog og tipik na lamang sa kasaysayan ang tanan tungod kay hangtod karon, nag-antos kita sa mga kawatan nga nagpabilin pa sa kagamhanan.
Sa panglantaw sa mga “negativist” dili na kita makalaum nga mahaon pa kita gikan sa bulok nga sistema sa pangagamhanan ug mao kini ang diskurso nga gamiton pagtudlo sa mga Pilipino nga nanglayat ngadto sa laing nasud aron pagpangita og bugnaw, malinawon ug mauswagon nga pagpuyo nga wala nila mahiagumi dinhi.
Dili hinuon ikalimod nga aduna pay nahibiling gamay nga padayong nakiglalis sa mga negativist ug nagtuong may paglaum pa nga mausab ang dagway sa Pilipinas bisan niining tanang mga kontrobersiya nga mitabon sa atong sistema.
Apan sa akong tan-aw, dili sayon ang paghilot sa piangon natong sistema mao nga malisud ang pag-usab sa bati nato nga dagway.
Makapila na kita ka higayon nga molaban og personalidad nga sa atong pagtuo maoy “bayani” nga makapa-usab sa atong sistema.
Hain na si Cory Aquino? Si Fidel Ramos? Si Juan Ponce Enrile? Si Butch Aquino ug daghan pang mga personalidad nga maisugong mi-martsa sa Edsa aron pangayuon ang pagpalagpot ni Marcos?
Hain na karon si Chavit Singson? Unsa nay iyang gihimo human siya mibarog pagtestigos batok sa giingong corrupt nga pamunoan ni kanhi Pres. Joseph Estrada?
Unsay nahitabo ni Erap Estrada human siya gitaral sa Sandiganbayan tungod sa kasong pagpangawat sa panudlanan sa kagamhanan?
Karon nga laing giilang “bayani” sa pipila nga si Jun Lozada ang maisugong nakigsungag sa First Family mahitungod sa anomaloso ug makauulaw nga transaksiyon alang sa national broadband network sa gobiyerno tali sa ZTE Corp. sa China, unsa nay mahitabo nato?
Wala gihapon!
* * *
DRUGTEST. Nagkatuis ang baruganan nilang Mayor Tomas Osmeña ug Bise Mayor Michael Rama mahitungod sa programa sa kagamhanan sa dakbayan sa Sugbu paglimpyo sa mga kawani gikan niadtong mga kawani nga nalambigit sa ginadiling drugas.
Gusto ni Tomas nga ipaagi lang sa tsismis aron mailhan ang mga adik-adik sa city hall ug palagputon sa katungdanan human sa makuting imbestigasyon, samtang si Mike gusto nga ipaagi gyud sa random drugtest ang tanan.
Bisan unsa nga paagi basta malimpyo lang ang city hall gikan sa mga adik-adik nga mga kawani, okey lang.
Grabe na kadaghan sa mga kawani sa city hall nga nagumon sa shabu. Busa angayan nila kining himoan og dinaliang aksiyon.
Legal ang paagi ni Mike, apan dili usab ilegal ang paagi nga gustong sundon ni Tomas tungod kay hatagan man og higayon nga makatubag ang kawani nga masakpan nga tiggamitan og shabu.
Ang labing maayong sistema mao kadtong makakunhod kun dili man ugaling mahurot kanang mga adik-adik diha sa Cebu city hall.
* * *
BADLONGON. Aduna g'yuy mga drayber ug mga tag-iya og sakyanan nga abusado kaayong mogamit sa karsada.
Niadtong udto sa Pebrero 14, na-engkuwentro nako ang drayber sa multicab nga iya sa Department of Education nga nagtangag sa plate number SHD-672.
Samtang milabang ko paingon sa parking area sa SM City Cebu, kalit lang misakdap sa akong atubangan ang hilabihan kakusog nga nagpadagan nga multicab sa DepEd.
Tungod kay likuon ang maong lugar apan wala siya mopahinay og padagan, misinggit ko sa drayber “paghinay bay.”
Nasuko hinuon ang kogtong nga drayber sa DepEd ug nanaog gyud sa gimaneho niyang multicab aron moharong kanako ug nakiglalis. Kung nako siya hadloka nga isumbong sa kadagkoan sa DepEd sa “reckless driving” niya, wala siya mobalik sa iyang sakyanan.
Pagka-walay batasan!
Laing sakyanan nga akong na-engkuwentro niadtong Pebrero 19 sa alas 11 sa gabii samtang paingon kaming mopauli sa akong pamilya sakay sa among sakyanan diha sa V. Rama mao ang overspeeding nga Pajero nga nagtangag sa plakang GPW 777.
Wala itugot sa regulasyon ang mga sakyanan nga magtaod og “wangwang” apan kadtong maong Pajero yano kaayong naka-overtake tungod sa iyang wangwang.
Dili ko motuong sa polis o NBI ang maong Pajero tungod kay pribadong sakyanan man.
Ang nakapait pa gyud, milapas sa solid line ang maong Pajero unya milabang desilya sa Natalio Bacalso gikan sa V. Rama bisan stop pa ang signal.
Pagka-walay batasan!
Ambot og unsa kahay aksiyon sa bag-ong director sa Land Transportation Office (LTO) nga si Raul Aguilos sa ingong mga klaseng mga motorista?