Ilaron ang pasahero

“Unsa man nang ubang taxi driver nga  ila man nga ilaron og maayo ang mga pasahero? Gikan sa Countrymall paingon sa SM ang tatak sa meter kay P100. Palihog ko og  paimbestigar ani. Labina gyud nang driver sa taxi nga may plate number GVY-238.” -- 0905-8814439 (Sent:04:33:46pm--February 5, 2008)

Akong awhag sa mga pasahero nga kun agrabyado mo sa paningil sa taxi nga inyong masakyan, mas maayo nga kamo mismo ang moreklamo ngadto sa buhatan sa LTO o ba kaha sa LTFRB. Mas epektibo kining paagiha kay sa magpunay tag yawyaw.

Kuhaag seguro ang ngalan sa taxi, plate number ug labing maayo kun makuha usab ang ngalan sa driver. Sumbong gyud sa proper authorities kun gusto mong maaksiyonan gilayon ang inyong mga reklamo.

* * *

“Sir, ireklamo unta nako ang taxi nga nasakyan namo gikan sa airport. Diri mi naog sa Pusok. Duha mi. P275 ang gikobra nga plite sa amoa. Hinaot makahimog action ang mga awtoridad bahin aning mga taxi driver nga morag mga tulisan. Makadaot man kini sa image sa siyudad.” -- 0919-2962954 (Sent:03:04:08pm-- February 5, 2008)

Angay gyud sumpoon ang mga taxi driver nga mapahimuslanon ug tikasan. Hain na man ang mga awtoridad? Labing maayo nga inyong panid-an kining mga draybera. Ug alang sa mga pasahero nga ilang nabiktima, sumbong mo sa LTO o sa LTFRB para sa dinaliang aksiyon. Ayaw ninyo i-tolerate ang maong binuhatan sa mga taxi driver.

* * *

“Good AM, Sir. Duna koy reklamo bahin sa brgy. 6 sa Tuburan. Wa man gihapon dakpa kanang ginganaln og Jefferson nga nagsige’g pamaligya og shabu. Nakapusil pa gani na siya. Maldito pa unya illegal pa gyud ang negosyo.”  -- 0929-2548741 (Sent: 07:41:49am-- February 6, 2008)

Atensiyon, mga opisyal sa brgy. 6. Subaya ninyo kining reklamo sa usa ka texter batok sa usa ka Jefferson nga giingong namaligyag shabu ug nakapusil pa gyud. Sutaa ninyo kun unsa kini ka tinuod ug himoi ninyog tukmang aksiyon. Kun tinuod nga nakapusil kining tawhana, wa ba diay mopasakag reklamo ang biktima o mga tagtungod ini?

(Sumbong ug reklamo? Text sa 0910-8105522)