Gustong patahimikin si Jun Lozada

SA palagay ko, may masamang balak kay Rodolfo Lozada, Jr. kaya siya “kinidnap” ng mga kalalakihan ha­bang nasa airport ga­ling sa Hong Kong. Dinala siya sa kung saan-saang lugar at dinala sa Laguna. Si Lozada ay witness sa NBN/ZTE deal.

Pero masuwerte pa rin si Lozada at naka­lig­tas siya. Gusto siyang mawala dahil sa ma­aaring ibul­gar niya ang detalye kung pa­pa­anong ang mga mata­taas na opisyal ay makikinabang sa NBN deal. Mabuti naman at listo ang mga ka­mag-anak at kaibigan niya. Si Lozada ay kinuha ni dating NEDA chief Romulo Neri bilang con­sultant ng NBN.

Marami ang nagsa­sabi na kaya kinidnap si Lozada ay dahil mag­hahasik ng lagim at isi­siwalat ang parti­si­pasyon ng mga ta­ong-gob­yerno na kikita ng limpak-limpak na pera. Ayan na nga. Totoo nga ang kinata­takutan nila na ma­aaring gawin ni Lo­zada. Nagsalita na nga si Lozada.

Lumilitaw ngayon na hindi gawa-gawa lamang ni Joey de Ve­necia, anak nang na­pa­­talsik na House Speaker JDV ang gi­nawa ni­yang pagsi­siwalat la­ban kay dating Come­lec Chair­man Benjamin Abalos at First Gentle­man Mike Arroyo. Nag­pahi­watig si Joey na ma­aaring alam ni Pre­sident Arroyo na may mga taong kikita nang malaking pera sa na­sabing tran­saksiyon.

Nang patalsikin si JDV bilang House Speaker, nag-privi­lege speech siya at inilabas ang baho ng mga Arroyo. Kasama na rito ang NBN deal at iba pang mga “money-making pro­jects”.

Kahapon ay huma­rap na sa Senado si Lozada at sana na­man ay magkaroon na ng kalinawan ang ka­song ito at lumantad na ang katotohanan.