Illegal nga sugal sa Malhiao

Niining bahina sa akong lindog, akong hatagan og agianan aron makalusot kining sulat gikan sa usa ka S.T. (inisyal) sa Malhiao, Badian, Cebu nga pinetsahan og Disyembre 10, 2007. Ang iyang sulat nagkanayon:

"Good AM, Sir. Gikan kini diri sa brgy. Malhiao, Badian, Cebu. Mahitungod kini sa mga illegal nga sugal nga naghitak o rampant na gyod kaayo diri sa among barangay Malhiao sama sa hantak, tong-its ug ilabina gyod kining jai-alai. Sobra na g'yod intawon og wala na g'yoy purohan pa nga masumpo kini kay abi nimo, Sir, ang nagmintinar niining maong matang sa mga sugal sukad pa kaniadto nga dugay nang panahon, gidumala kini sa pipila ka brgy. officials, ilang mga asawa ug pipila ka mga tanod. Karon nasublian na pod pagka konsehal kining mga tawhana sa nakalabay'ng election. Sila'y utok pagmintinar niining matang sa sugal nga jai-alai. Ang ilang mga asawa maoy kaabag sa pagpangaser matag adlaw.

"Busa, Sir, subo gyod kaayo namong palandongon nga mga taga brgy. Malhiao nga posible gyod nga mosulod ang kawat diri sa among dapit kay naghari na man kining ilegal nga sugal ug mosamot pa kay ang pipila ka brgy. officials mao man ang nagdumala niini. Kinsa pa may modakop or mobadlong nga hasta mga tanod mao man sab ang ilang kaabag?

"Busa, Sir, pinaagi sa imong lindog sa Banat News nga maoy among kinaham ug pinalabi nga pamantalaan, manghinaot ko nga ang akong suwat-reklamo mapatik dinhi sa Modus aron unta makabasa ang natungdan ning akong suwat-reklamo kay dili man gyod matarong ang mga brgy. officials nga nangulo sa mga illegal nga sugal. Daghang salamat daan. -- S.T., Malhiao, Badian, Cebu."

* * *

Dili lang una ko mokomentaryo kalabot niining mga pasangil ni S.T. Aron patas ang tanan, hatagan ta'g higayon nga makatubag niining maong alegasyon ang mga barangay opisyal sa Malhiao, Badian, Cebu. Kun nakabasa mo ning suwat-reklamo sa usa sa inyong ka konstituwente nga gipadangat dinhi sa atong column, bukas kining lindog alang sa inyong reaksiyon ug pagpasabot usab sa inyong habig. Sama sa sulat ni S.T., ipatik sab nato dinhi ang inyong tubag.

(Sumbong ug reklamo? Text sa 0910-8105522)