Ang tarung nga tagduma sa trapiko, sa di pa mopasiugda og bisan unsang kausaban tungod sa nag-ung-ong nga dakong trabaho sa kadalanan, mohimo una sa mosunod nga batakang mga pangandam:
Susihon pila ka sakyanan ang maapektahan sa tukuron nga proyekto;
l Hawanan ug andamon ang alternatibong mga agianan alang sa matanggong nga mga sakyanan;
l Pangitaan og mga sulbad nga makapahapsay inay makapasamot sa kagubot sa pagbiyahe sa mga pasahero ug mga motorista;
l Pagkonsulta sa hingtungdang mga hut-ong sa katilingban aron kahatagan sila sa kahigayonan pagluwat og mga sugyot pinasikad sa ilang inadlaw’ng kasinatian sa kadalanan; ug
l Pagpahibawo sa katawhan sa maumol nga mga sulbad sa di pa ipatuman aron kahatagan silag igong panahon pagpangandam.
* * *
Ang Citom gidudahan nahinumdom pa ba nga ang labing mahinungdanon nilang gimbuhaton mao ang pagpahapsay sa trapiko, di ang pagpangolekta og multa, di pagpangilkil, di pagsipsip sa mga politiko, di pagdason sa mga proyekto nga kuwestiyonable ang kapuslanan ug, labaw sa tanan, di pagduwa-duwa sa katawhan pinaagi sa paglusad og mga eksperimento nga way igong sukaranan.
Ang kontrobersiyal nga flyover sa Banilad sa niaging tuig pa untang tukuron. Aron di mahasol ang mga Sugbuanon ug ilang mga dumuduong, nauyonan nga sugdan sa liwas na sa Sinulog. Sa ato pa, dunay igong higayon ang DPWH ug Citom sa pagpangandam. Apan nganong nangiyugpos ra man sila sa nangaging mga buwan?
Salamat sa ilang pagpabaya, ang katawhan karoy nasiging-siging. Sa way pagkonsulta, pagpahibawo ug pagpasabot sa katawhan, gibabagan ang ilang mga sakyanan ug gipamugos ang sulbad nga gikahadlokang mas grabe pa kay sa problema.
* * *
Mas makiangayon ang baruganan ni Cebu City Councilor Sylvan Jakosalem. Nisugyot siya nga sugdan ang flyover nga di usbon ang sistema sa trapiko gawas sa pag-andam sa tanang lutsanan. Nipasabot siya nga ang labing maayong mahimo sa Citom mao ang pagtabang sa mga motorista aron nga di sila matanggong sa bisan asang agianan nga ilang pilion.
Apan nakatag-an mo. Si Jakosalem, bisan maoy presiding officer puli ni Cebu City Mayor Tomas Osmeña, wa tuohi sa iyang kaubanan sa Citom board.
* * *
Ang mga plano sa Citom, ang odd-even scheme ug ang rerouting sa PUJs nga wa maapil sa eksperimento kay wa pa maandam ang traffic signs, pulos naumol pinasikad sa papel. Wa ipatugkad sa yuta. Maong nagpatuyang si Arnel Tancinco sa Citom pagpangugat nga ipatuman ni gikan sa alas-6 sa buntag hangtod alas-10 sa gabii gikan sa Lunes hangtod sa Domingo. Bahala na kun nakalimtan niya pag-ihap pila ka sakyanan ang mangagi sa unsang oras sa unsang adlaw.
Kun mao ning kalidad sa liderato sa Citom, may sukaranan ang pagduda nga sila ang nakapabara inay makapasutoy sa trapiko.
Email:leo_lastimosa@abs-cbn.com