Daghang reklamo batok sa Banilad flyover project. Kay tuod man ang pagtukod niini moresulta man sa dakong inconvenience o kahasul ngadto sa lumolupyo sa maong dapit ug sa mga motorista.
“Apan kini sa sinugdanan ra,” matud pa sa usa ka tigpaniid kang kansang baruganan pabor sa maong proyekto.
Matud niya hasul kaayo alang kaniya nga taga Banilad ug mga sakop sa iyang pamilya, labi na ang mga tinun-an nilang anak, “apan ako ra ning giantus kay ang kaugmaran niini kalambuan man sa atong dakbayan.”
Tuod man, kun atong hunahunaon sa sinugdanan ra ang kahasul nga maiya sa katawhan, ilabi na sa mga motorista, apan inigka human sa proyekto kinsa man say mahayahay?
Ang flyover, sama sa mga mas dagko pang flyover sa Metro Manila gimugna dili aron paantuson ang katawhan hangtud sa hangtud. Gimugna kini kay sugo man sa panahon diin gikinahanglan ang maong butang alang sa kauswagan ugma.
“Antus lang gamay,” suma pa sa tigpaniid nga atong gihisgutan sa unahan. “Alang kini sa kalambuan.”