Ang kabililhon sa mga kustomer
Sa
Dili na lang nako ibutyag ang ngalan sa maong bakery kay basin isipon na kining advertising. Wala ra ba gayod makaila nako ang tag-iya sa maong bakery. Basta kay sikat na kaayo ang maong bakery karon. Daghan na kining branches sa lainlaing mga probinsiya. Lamian sab kaayo ang ilang mga pan.
Mao tingaling gisuwerte ug miasenso gyud ang tag-iya sa maong bakery tungod sa paghatag nilag bili sa ilang mga kustomer. Baya na man kanang uban, dili gani maantigong mo-entertain og kustomer. Naay ilang mga tindera nga dili maantigong moatiman sa ilang mga pumapalit. Nagkusmod lang ang dagway, morag hawod.
Lahi kining bakery nga palitanan nakog pan nga maayo gyud mo-entertain og kustomer ang mga tindera. Kaha, gipahimangnoan gayod sila sa ilang employer sa paghatag og bili sa ilang kustomer nga maoy nagbuhi sa ilang negosyo. Kay tinuod man sab gyud nga kun wala ang mga kustomer, dili gyud motunhay ang ilang negosyo.
Tinuod ang giingon nga “customers are the reason for our existence and success.” Mao unta kini ang isilsil sa hunahuna sa matag negosyante. Ayohon unta nila’g tagad ang ilang mga kustomer kay kini ang nagbuhi sa ilang negosyo.
Subo kaayong hunahunaon nga naay ubang mga negosyante nga lisodlisoron pa ang ilang kustomer. Tikasan, limbongan, pahamtangan sa makabungog nga presyo. Morag wala tingali sila makaamgo nga ang kabililhon sa mga kustomer nagsumikad sa kamatuoran nga kini ang hinungdan sa ilang pagtunhay. Maong yanohon na lang nila’g lapas ang katungod sa mga kustomer. Pastilan!
Naay uban nga estrikto kaayo ngadto sa mga kustomer. Pahulaton pa nila’g dugay ang kustomer kay gituman ang nonsense nilang panagtabi. Unya pa gyud, dili sab mohatag sa saktong sukli (shortchanging). Naa say uban nga overpriced kaayo ang mga baligya. Unta makaamgo sila nga ang mga kustomer maoy hinungdan sa ilang existence and success, sama sa suki nakong bakery.
(Sumbong ug reklamo? Text sa 0910-8105522).
- Latest
- Trending
