Pagkanindot tan-awon. Makamugna og dili hitupngang kalipay. Makapabuhi sa dugo niadtong mga tawo nga hapit nang nawad-ag paglaum.
Ang unsa gud? Way lain kun dili kadtong mga hulagway nga gipatik kagahapon sa The Freeman, igsuong mantalaan ning Banat News, diin naglamanohay silas Mayor Tomas Osmeña ug Gobernador Gwen Garcia ug diin giakbayan ni Tom O si Lahug Brgy. Kapitan Mary Ann de los Santos.
Sa ato nang nasayran nga dili maayong relasyon tali sa gobernador ug sa mayor ug laing bahin, tali sa mayor ug sa kapitan sa barangay Lahug.
Manghinaut kita nga kining maayong kabubut-on nga atong nakita sa hulagway tali sa Mayor, gobernador ug barangay kapitan usa ka milagro nga gihimo ni Sr. Sto. Niño ug mopadayon bisan walay kamera sa mga tigbalita.
Maayong tilimad-on kini alang sa Sugbu.