Si Santo Niño ug ang itom nga Nazareno

Duha ka mga dagkong pangilin sa simbahan ang matigayon matag una gayong bulan sa tuig dinhi sa nasud, ug kini mao ang pangilin sa itom nga Nazareno sa Quiapo sa kaulohan ug ang pangilin ni Senyor Santo Niño dinhi sa Sugbu. Ning duha ka mga pangilin gipakita gayod sa mga debotos ang dako nilang pagtuo ngadto sa itom nga Nazareno ug ni Senyor Santo Niño. Ang nakalahi lang sa duha ka pangilin ug sa mga debotos niini mao ang paghimo sa mga debotos sa ilang pag-ampo ngadto sa duha ka mga gituohan natong gamhanan. Samtang solemne ug linaw ang procession ni Senyor Santo Niño dinhi sa Sugbu tungod kay nanag-ampo ang mga mikuyog sa iyang procession, nangalandig sa tambalanan ug aduna pa gani gyuy nangamatay nga mga debotos human matumbi ug mangapiit sa duot-duot aron lang makaduol ug makahikap sa pisi ug karo sa itom nga Nazareno. Dili sa pagkomparar, ang mga debotos sa itom nga Nazareno mga wild na kaayo tungod lang sa pisi ug karo nga gusto nilang mahikap ug makuptan samtang ang mga debotos ni Senyor Santo Niño kalma lang nga nag-ampo ug nagrosaryo samtang naglakaw kuyog sa procession. Maong nakapangutana ko sa akong kaugalingon kun nganong managlahi man ang atong paghimo sa atong pag -ampo kanila nga mao ra man unta kining itom nga Nazareno ug si Senyor Santo Niño. Daghan nang namatay ug nangaangol sa procession sa imahen sa itom nga Nazareno sa Quiapo tungod lang kay gustong mohikap ug mokupot sa pisi niini ug karo. Sa akong pagtuo wala mahimuot niini ang itom nga Nazareno. Samtang manghinaot lamang usab ako nga dili unta mausab ang ka-solemne sa pag-ampo sa mga debotos ni Senyor Santo Niño.

.* * *

Malinawon ug malampuson ang pagpahigayon sa Sinulog 2008 Grand Mardigras kaniadtong Domingo bisan man tuod nga atong naobserbahan nga adunay mga nagsuroy-suroy sa dalan sa rota sa sinulog nga nagdala og mga ilimnong makahubog nga wala mabadlong sa atong mga otoridad, apan bisan pa man niini saludo gihapon ako sa mga organizers ug sa kapulisan ug militar ingon man sa mga civilian volunteers ug katawhan nga miabag aron ang sinulog magmalampuson.

* * *

Ako diay nga pahalipayan ang mga opisyal sa among lungsod sa Bien Unido, Bohol pinangulohan sa among maabtik ug batan-ong mayor, Mayor In In Boniel tungod sa pagsalmot niini sa Sinulog. Wa man tuod modaug ang among Hagwa Festival sa unang pag- apil niini sa Sinulog pero gipasigarbo ko gihapon kini tungod kay at least hinay-hinay nang nailhan ang among lungsod diin dinhi naggagikan ang bagang supply sa guso sa Sugbu ug nasud. Better luck next time.