Obserbasyon sa daghang tigpaniid: Ang gidaghanon sa mga tawo nga midagsa sa Sugbu atol sa miaging Pista Senyor ug Sinulog festival maoy labing daghan sa kasaysayan sa among kasaulogan.
Kami nga nakasaksi sa kasaulogan sa pista sa atong patron Sr. Sto. Niño sa daghan nang katuigan uyon sa maong obserbasyon.
Ang pagsugwak sa debotos ni Sr. Sto. Niño mipakitag duha ka butang: Nagkadaghan ang nakabaton og grasya ug nagkadaghan usab ang midangop sa Patron alang sa grasya nga ilang gipangayo.
Ang lintunganay niini mao ang nagpadayong pagsalig sa mga Sugbuanon ngadto ni Sr. Sto. Niño kinsa sa daghan nang katuigan mipakita usab sa iyang dakong pagmahal sa mga Sugbuanon.