Landonian tribe nibahar

Samtang akong gisuwat ning maong lindog, nalingaw kong naminaw sa mga espisyal nga mga sonata sa Cebu City Sports Center atol sa lunch break sa Sinulog Grand Parade kagahapon.

Gipasundayag ang best of Cebu sa libuan ka mga lokal ug langyaw nga mga turista nga nitambong sa Sinulog. Mabulokon ang mga presentasyon kagahapon ug nakahatag gyud sa hustong kalingawan sa mga nanan-aw gawas lang sa usa ka contingent nga gipaabot unta nga molingaw sa crowd.

Daw nahugno ang nag-atang sa Landonian Tribe tungod sa “lousy” nga presentasyon niini kagahapon. Ambot unsay nahitabo sa maong grupo nga labihan man unta ka alegre niini sa nanglabay’ng mga Sinulog? Apan kagahapon luya ug wa g'yuy lami ang ilang pasundayag. Ambot wa ba kaha moduyog sa ilang sponsor ang GLOBE nga sud sa nanglabay’ng mga adlaw wa say klarong serbisyo sa publiko.

* * *

Matag Sinulog ug uban pang mga dagkong kalihukan nga sama niini, matataw ang dakong panginahanglanon nga ibalik nato ang ROTC program sa mga tunghaan.

Tungod kay sa maong mga higayon kinahanglan gyud kaayo ang mga kadete alang sa crowd control. Lahi ra gyud ang mga tinun-an nga nikuha sa alternative program hulip sa ROTC, ang CWTS, kun itandi sa mga ROTC cadets og disiplina maoy hisgutan. Akong naobserbahan kagahapon nga ang crowd control nga gidumala sa CWTS lousy kay sa mga ROTC cadets. Sagad sa mga CWTS nanglingkod sa daplin og gipasagdan ang mga tawo nga modutdot nga makasamok sa mga dancers sa parade.

Kun ROTC cadets ang gamiton makita nimo ang disiplina nga di mobiya ug manglingkod hangtud nga dunay mando gikan sa ilang mga labaw. Sa laktud lahi ra gyud ang disiplina sa mga nikuha og ROTC ug niadtong mga wa mokuha sa maong training program.

Busa mas maayong atong ibalik ang compulsory program sa ROTC diha sa mga tunghaan aron makuha sa tanang mga tinun-an ang military discipline.

* * *

E-mail:   [email protected]