EDITORYAL - Lain na sang testing sa kapolisan

Sa makausa pa testingan nasad ang kabatid sa atong kapolisan sa pagpahapsay sa ipahigayon nga Sinulog grand parade ugmang adlawa.

Suma pa sa pipila ka mga tigpaniid, ang atong kapolisan nakapasar sa mga testing kon pagsuway sa ilang abilidad sa miaging mga Sinulog bisan adunay gagmay’ng mga kakulian nga ilang nasugatan.

Halapad ug higpit nga pagpangandam ang gihimo sa atong mga polis alang sa Sinulog 2008 ug gipanglantawan nga mas taas nga grado ang ilang maangkon ning tuiga.

Walay rason nga dili magmalinawon ug hapsay ang Sinulog 2008 tungod kay gawas sa dakong preparasyon sa kapolisan, abagan pa gyud kini sa mga elemento sa militar ug mga kadete gikan sa nagkadaiyang eskuylahan.

Apan manghinaut lang gihapon kita nga malinawon ang Sinulog tungod kay matud pa nila mas daghan karon nga mga foreign ug domestic tourists ang midagsa sa Sugbu alang sa maong kasaulogan.