Pangilog eksena
Walay dautan kun hatagan og higayon ang mga piniriso sa pagpakita sa ilang naantigohan sa paglingaw sa katawhan, ilabi na nga sila pundok sa katilingban nga makausa nahisalaag sa maayong dalan, apan gikupkop sa gobyerno aron sa pag-usab sa ilang pagkinabuhi.
Apan kun ang pagpasayaw sa mga dancing inmates sa Cebu Provincial Detention and Rehabilitation Center atol sa kasaulogan sa Pista Señor, usa na kini ka pagpangilog og eksena nga kinahanglang sawayon ug ikondenar sa publiko, ilabi na sa mga magtutuong Katoliko Romano.
Si Gobernador Gwendolyn Garcia ug ang iyang igsuong consultant on security sa Kapitolyo nga si Byron Garcia nasayod sa petsa matag tuig kanus-a saulogon ang kapistahan ni Señor Sto. Niño, apan nganong giatol man nila ang pagpasayaw sa mga piniriso sa CPDRC sa adlaw sa Sinulog? Wala ba diay laing petsa sa Enero?
Kun tuyo sa mga Garcia ang pagsungag ni Mayor Tomas Osmeña tungod sa politikanhong interes, maayong ibutang sa ilang hunahuna nga walay labot si Señor Sto. Niño sa ilang away.
Ang pagkasikat sa tibuok kalibutan sa mga piniriso tungod sa pagkabutang sa website sa ilang sayaw dili paigo aron himuong rason nga hatagan sila og higayon nga makapangilog og eksena.
- Latest
- Trending
