Dili masumpo

Dunay nag-text nako nga dili gayod (kuno) masumpo ang suliran sa ginadiling drugas diha sa Tutay, Pinamungajan, Cebu. Daghan na gyod kaayo ang mipadangat nakog reklamo bahin niini hangtod karon ingon sa untouchable gihapon ang mga responsable bisan dayag na kaayo ang pagpamaligya sa mga tigpayuhot.

Ang usa nato ka texter nagkanayon: “Dili gyod masumpo ang drugs diri sa Tutay, Pinamungajan kay hasta ang polis mosuyop man. Naa pa gyoy protection money para dili dakpon. Naa sab konsehal nga manuyopay. Naa poy anak sa barangay captain sa una nga namaligya pod.”--0910-4305708 ( Sent: 01:06:43pm--December 3, 2007)

* * *

Kun tinuod man kini, tulibagbag gyod kaayong pamation. Tinuod nga dili gyod masulbad ang suliran sa drugas kun adunay mga tinugyanan og balaod ug mga piniling opisyal nga utro sab nga nalambigit sa maong suliran. Labing maayo tingali nga i-counter check kini sa hepe sa kapolisan sa Pinamungajan aron masuta kun tinuod ba kini o dili. Gawas niini, kinahanglan sab gyod nga molihok na ang mga barangay opisyal sa Tutay kalabot niining mga taho nga atong nadawat.

Bisan gipaagi lang sa text ang mga taho nga gipadangat ning atong lindog apan angay kining hatagan og pagpakabana. Kun dunay aso, dunay kayo. Busa posible nga aduna gyoy naghimog illegal nga kalihokan diha sa Tutay, Pinamungajan, partikular na ang pagpamaligya og ginadiling drugas.

* * *

Ang ikaduhang texter nag-ingon: “Dili madala sa barangay ug polis ang drugs diri sa Pinamungajan ilabi na sa Tutay kay mahadlok ang kapitan ug mga konsehal, hasta ang polis.”--0917-9377502 (Sent: 01:12::02pm--December 3, 2007)

Morag dili ko makatuo nga magpadaog na lang ang kapitan, konsehal ug polis sa mga naghimong illegal nga kalihokan. Kun tuohan god nato ang text, molutaw nga inutil ang mga barangay opisyal ug ang mga polis.

Buyno, aron pagmatuod nga dili sila inutil, ato silang hagiton sa paghimog lakang batok sa ginadiling drugas nga giingong dagsang kaayo sa ilang lugar. Ang dinaliang aksiyon maoy gikinahanglan sa mga nagreklamo dinhi kanato.

(Sumbong ug reklamo? Text sa 0910-8105522).