Tinaguan ni Gubalane
Ambot og angayan bang tuohan si assistant city prosecutor Fernando Gubalane nga pinasikad gyud sa ebidensiya ug way nagpahiping pabor sa iyang pagbali sa duha ka mga resolution sa mga kasong libelo nga naglambigit sa beteranong kolumnista ug magsisibya nga si Leo Lastimosa ug Gobernador Gwendolyn Garcia.
Duha na ka mga kasong libel nga gipasaka ni Garcia batok kang Lastimosa ang miagi sa mga kamot ni Gubalane isip reviewing fiscal. Ang maong mga kaso pulos unta girekomendar nga ibasura tungod sa kakuwang og mga ebidensiya sa mga panel of prosecutors nga nag-imbistigar niini.
Apan ang mga rekomendasyon sa panel pulos pod gibali ni Gubalane ug gisang-at sa korte. Kumo reviewing fiscal, ang iyang resolution maoy mipatigbabaw hinungdan nga ang tanang kasong libel batok ni Lastimosa niabot gyud sa korte.
Ang maong mga kaso tungod ni sa mga lindog ni Lastimosa sa The Freeman. Una mao ang iyang lindog niadtong Abril nga giulohan og “Paugat ni Gwen”. Ikaduha mao ang lindog nga giulohan og “Doling Kawatan.”
Sa unang lindog, gisaway ni Lastimosa si Garcia tungod sa matud pa paglikay-likay niini sa iyang kaalyado sa politika nga si kanhi mayor Teddy Ouano sa Mandaue sa dihang nabulilyaso sa anomalosong kontrata pagpalit sa mga decorative lamppost atol sa Asean Summit.
Ang ikaduhang lindog nga gibasihan sa kaso, way klaro kun ang gobernador bay gipasabot ni Lastimosa nga mao si Doling kawatan, apan dunay mga testigo ang kampo ni Garcia nga siya maoy gitumbok ni Lastimosa sa lindog niini.
Nitoo na unta hapit ang tanan nga ligdong ug gipasikad lang gyud ni Gubalane sa ebidensiya ang iyang pagresolbar sa maong mga kaso, hangtud nga akong nakoykuyan ang dokumento nga nagbutyag sa posibleng conflict of interest ni Gubalane.
Luyo sa kasayuran sa publiko, si Gubalane usa diay sa mga nagtinguha nga mamahimong regional state prosecutor dinhi sa Central Visayas hulip ni Antonio Arellano nga gibalhin na didto sa Davao.
Way dautan kun siya mo-apply sa maong pwesto kay kuwalipikado man siya niini. Ang dautan mao nga wa siyay delicadeza pagpangayo og endorsement gikan ni Garcia aron siya matudlo sa pwesto.
Ang dokumento nga akong nakuha nagpakita nga si Gubalane gituboy diay ni Garcia uban sa iyang amahan nga si kongresista Pablo Garcia sa segundo distrito sa lalawigan, kongresista Raul del Mar, Antonio Cuenco, Mayor Tomas Osmeña ug city prosecutor Nicolas Sellon.
Karon kinsa pa may motoo sa kaligdong ni Gubalane pagresolbar sa mga kasong libelo ni Lastimosa kun siya nakakuha diay og pabor gikan ni Garcia?
Gani ang akong tinubdan sa kaulohan nagkanayon nga si Gubalane nalakip gyud sa shortlist nga gipilian ni Presidente Gloria Macapagal Arroyo alang sa pagka RSP dinhi sa region 7. Uban niya mao sila si assistant city prosecutor William Canta ug Perla Centino.
* * *
- Latest
- Trending
