Usa ka magbabasa niining atong mantalaan misugyot ngadto sa atong mga politiko, ilabi na kadtong buot magpapili sa pagkapangulo sa nasud, sa pag-obserbar sa pamaagi sa pagpili sa ilang kandidatohon pagkapresidente sa duha ka mayor nga partido politikal didto sa Amerika.
“Hapsay ug malinawon ang ilang pamaagi ug walay mga intriga ug lapukong alegasyon ngadto sa usag usa ka kandidato,” matud pa sa magbabasa kinsa nagpailang si Dr. (of Philisophy) Ricardo Asuncion, Sugbuanong dugay’ng nanimuyo sa Amerika diin nagtudlo sa kurso nga political history sa usa ka unibersidad.
Matud ni Dr. Asuncion, kining pagpili sa Democrats ug Republicans sa ilang kandidatohon pagka-presidente unya sa Nobiyembre, usa ka demokratikanhong paagi diin akseptado sa tanang pagpapili ang “rules of the game.” Way daghang kyaw-kyaw, way insultohay, way reklamohay.
Tinuod. Kami miuban ni Dr. Asuncion sa iyang awhag ngadto sa mga pilionon nga Pilipino sa ngan sa mahusay ug malinawon nga piniliay.