Tikasan nga timbangan

Duna gyuy nagnegosyo diha sa kamerkadohan nga naggamit sa tikasan nga timbangan. Posibleng nagbaton sab sila’g timbangan nga sakto ang kilohan ug kini ilang ipakita sa higayon nga moinspeksiyon ang mga awtoridad. Ug sa higayon nga walay mag-monitor sa ilang kalihokan, ang tikasan nga timbangan maoy ilang gamiton.

Usa ka magbabasa ning lindog mi-text nga nagkanayon: “Good PM, Sir. Moreklamo lang ko bahin aning maninda og isda diha sa Pasil. Nakapalit ko og isda nga kulang og duha ka guhit para mausa ka kilo. Pag-abot nako sa amo akong gitimbang sa among timbangan, sus, wala gani makaabot og 3/4. Nagtuo ko nga silang tanan diha walay insakto nga timbangan kay ang ilang balde dili ibutang sa timbangan. Maayo unta nga masumpo ni sila. Luoy kaayo ang mga pumapalit nga mibayad og sakto unya kulang ang ilang timbangan.” -- 0920-7126356 (Sent: 03:25:54pm--December 14, 2007)

In fairness ngadto sa nagtinarong, ako wala magtuo nga ang tanang mga namaligyag isda diha sa Pasil naggamit og timbangan nga kulang sa kilohan. Dili sab makiangayon kun atong iangin ang nagtinarong sa binuhatan sa pipila nga nagpabadlong.

Ang akong ikasulti mahitungod niini mao nga usa kini ka hagit ngadto sa proper authorities. Angay gyud kini nilang himoan og tukmang lakang. Labing maayo nga masusi nila kini. Mas maayo kun random ang ilang pagpakisusi mahitungod niini aron dili makabantay ang mga badlongon nga mga fish vendor.

* * *

“Good day, Sir. Palihog ra kog paabot ngadto sa kapitan sa barangay Apas nga nagkagrabe na man ang tong-its diri. Naa ni duol sa may grotto. Grabe ang sugal diri.” --0906-7016066 (Sent: 02:43:52pm--December 9, 2007)

Daghang salamat sa imong text. Nanghinaot ko nga makaabot dayon kining maong kasayoran ngadto sa atensiyon sa kapitan sa Apas. Misalig ko sa iyang kaligdong busa dako ang akong pagtuo nga iyang mahimoan og lakang kining problema sa sugal diha sa iyang barangay.

Usahay dili madali ang pagpitol sa mga badlongon kay kinahanglan mang ipaagi kini og due process. Busa, magpailob lang una kita.

* * *

 (Sumbong ug reklamo? Text sa 0910-8105522).