Angay g’yod tuod nga aksyonan na ni Mayor Tomas R. Osmeña ang mga report nga nagpasangil sa iyang secretary nga si Agapito Cugay Jr. nga kuno posibleng naghimo og mga binuang mao nga mikalit lang kakwartahan.
Mihimo ko’g pakisusi ug mikuha sa baruganan sa mga kawani sa City Hall kun unsa’y ilang gusto. Kadaghanan sa akong napangutana miingon nga mas labing maayo nga dunay ilusad nga imbistigasyon aron mahibaw-an ang tinuod.
Dili basta-basta ang pagduda ug mga pasangil ngadto ni Cugay. Gihimo ang pasangil pinaagi sa suwat nga gipakatap sa City Hall, karong bag-o anaa na usab sa official website sa Cebu City government.
Ang pasangil nagkanayon nga kaniadto kuno si Jun Cugay nga yano lang nga kawaning kaswal sa City Hall atol sa termino ni Alvin Garcia, magsakay lang og “habal-habal” nga motorsiklo kun mopauli sa barangay Tagbao.
Karon kuno, si Cugay ngilngig na kaayo kay magsakay na’g Pajero. Bilib ko sa naghimo niini kay kun tinuod man, suheto kaayo kini sa pagkatawo ni Cuenco.
Ang mga higala ni Cugay mitug-an kanako nga ang “Secretary to the Mayor” kusganong nanghimakak sa mga pasangil kaniya nga siya nakahimo og graft and corruption mao nga siya nakuwartahan.
Daghang pasangil nga si Cugay nakabaton na og daghang katigayunan human siya mahimong “secretary to the mayor” dihang si Mayor Osmeña milingkod pagka mayor sukad kaniadtong Hulyo 2001.
Grabe ang pasangil nga angay’ng tubagon ni Cugay. Kini mao nga daghan sa iyang kabanayan – apil na ang mga kabanay sa “suod” niyang higala — gipasulod niya’g trabaho sa lainlaing buhatan sa City Hall.
Si Cugay gihulagway nga inpluwensyado kaayo sa City Hall kay ang papeles sa mga gustong motrabaho sa kagamhanan sa dakbayan, mag-agi gayod sa iyang buhatan.
Bitaw, bisan ako dili pa gyud motuo nga si Cugay – kinsa hilomon nga pagkatawo – nalambigit og binuang. Apan tambag nako nga kinahanglan nga siya mobulontaryo sa pagpa-imbistigar aron malimpyohan ang iyang ngalan.
Grabe na kaayo ang awhag sa katawhan nga imbistigahon gayod si Cugay, ug ang awhag anaa pa kini gihimo sa official website sa dakbayan sa Sugbu.
Ang hagit god gitumong man ngadto ni Mayor Osmeña. Ang mayor kuno kusog kaayong mohimo’g aksyon kun ang isyu maglambigit og yanong mga kawani, apan kun iya na ganing suod ang malambigit, magpakahilom lang.
* * *
Ang reklamo batok sa mga sidewalk food vendors diha sa Fuente Osmeña panahon sa gabii, angay lang tingali nga sabton kay kabahin kini sa pagsaulog sa Fiesta Senyor.
Gitataw ni Ma’am Dolly Suzarra sa Sinulog Foundation Incorporated nga ang maong mga tindera nga dunay mga stalls nga gimarkahan og brand sa softdrinks, gitugotan kini sa Sinulog Foundation.
Gipasabot ko ni Suzarra nga ang maong softdrinks company usa sa mga major sponsors sa kalihukan sa Sinulog mao nga gitugotan nila nga makabutang kini’g stalls diha sa may Fuente Osmeña kay kabahin kini sa ilang “marketing agreement.”
Sagdi na lang, kutob ra bitaw na sa Fiesta Senyor.
* * *
Lain pay ato, kadtong mga magbubuhis dinhi sa dakbayan ayaw mo kalimot nga kinahanglan mo nga mo-renew sa inyong mga permit sa dili pa ang Enero 20. Kun adto na kamo mo-renew lapas sa Enero 20, aw makabayad na mo’g multa.