EDITORYAL - Si Erap nasad?

Init kaayo ang balita nga dako ang kahigayonan nga modagan pag-usab si kanhi Presidente Estrada kinsa gi-pardon ni Pangulong Arroyo human nakombikto sa sala nga plunder ug gihukman nga prisohon sa tibuok niyang kinabuhi.

Ang mga tigpaniid nagtuo nga modagan ug modagan gyud pag-usab si Erap. Ug ang maong mga tigpaniid nagtuo usab nga modaug nasad kining nagpatuo nga sandiganan sa mga timawang masa.

Aduna nay 90 milyones ka mga Pilipino suma pa sa labing ulahing sensus. Siyaro na man sad wa gyuy laing usa ka tawo nga dunay katakos sa pagpadagan niining nagkagidlay tang nasud?

Kining mga “recycled” tang lider sa politika moundang na unta sa pagtinguha nga ma-presidente ug hatagan usab nila og kahigayonan kadtong ubang Pilipino nga dunay sinserong tuyo sa pagsilbe sa nasud.