Maninda og shabu

"Good morning, Sir. Ang barangay Tutay sa Pinamungajan, Cebu daghan kaayong naninda og shabu. Nabalaka ko kay basin ang among mga anak maapil niini. Hugaw kaayo ang among barangay." -- 0905-8621530 (Sent: 09:35:47 am--October 26, 2007)

Angayan gyod ninyong bantayan ang inyong mga anak. Karong panahona nga mikaylap na pag-ayo ang ginadiling drugas, kinahanglang tumanon sa mga ginikanan ang ilang obligasyon ngadto sa ilang mga anak. Ayaw isalig sa uban ang kaugmaon sa inyong mga anak kay inyong responsibilidad ang pag-agak kanila sa hustong dalan.

Awhagon sab nako ang mga barangay opisyal sa Tutay, Pinamungajan sa pagsusi niining taho sa atong texter. Kamo man gyod ang mas nasuheto sa among dapit, i-counter check ninyo palihog kun unsa ka tinuod nga daghang nanindag shabu diha sa Tutay. Palihoka sab ninyo ang inyong mga  barangay tanod.

Bahin sa giingon sa atong texter nga "hugaw kaayo" ang ilang barangay, dili lang una ko mokomentaryo mahitungod niini kay wala man sab mohatag og specifics ang atong texter kun unsang matanga sa "hugaw" ang buot niyang ipasabot.

* * *

"Sir, good day. 24 hours unta ang pag-duty sa mga traffic enforcer diri sa Sugbu, shifting lang sila, ba. Kay kun off duty sila anha pod magpabadlong ang mga jeepney ug taxi driver. Di na mo-follow sa traffic rules kay abi wa nay mga traffic enforcer." -- 0915-3388073 (Sent: 08-42:51 am -- October 26, 2007).

Nindot ang imong sugyot, higala. Mao gyud unta kiniy angay buhaton aron mohapsay ang trapiko. Ako makamatuod sab sa imong giingon nga dili na motuo og traffic rules ang mga driver basta makamatikod silang wala nay enforcer nga nagbantay. Ang resulta, mosamot ang kahuot sa dagan sa trapiko.

Makadaghan ko makasaksi niini labina na diha sa Colon area. Ang enforcer ray bantayan. Ambot, kinaiya na gyod tingali sa kadaghanan sa mga driver nga malipay kun maka-violate og traffic rules. Mora bag ilang i-challenge ang enforcer. Unya ra ba kun madakpan na, kusog magbagulbol.

(Sumbong ug reklamo? Text sa 0910-8105522)