EDITORYAL - Ang trapiko sa Sinulog

Daghang mga motorista ug mga pedestrian ang nangreklamo sa kahuot sa trapiko niadtong naghinangat na ang Pasko ug Bag-ong Tuig.

Heavy kaayo ang vehicular traffic bisag asa adtong tungora.

Pipila ka mga tigpaniid sa situwasyon sa trapiko dinhi sa dakbayan  ug suburban areas nagpaabot ug nagtuo nga mas mograbe ang kahimtang sa trapiko inighapit na ang Sinulog mardi gras labi na sa adlaw na gyud sa pagsaulog niini.

“Kini ato nang na-obserbahan sa mga miaging Sinuog,” matud pa ni retired Col. Rolando Diaz. “Modagsa man gud ang mga tawo gikan sa kalungsoran ang uban kanila da’a sa ilang mga sakyanan.”

Dili kuno parehas sa Pasko ug Bag-ong Tuig diin ang mga tawo adto ra mosaulog sa ilang matag lungsod.

Apan sayod na tingali ang traffic experts sa siyudad ug nasugdan na niini ang pagpangandam sa mga plano ug estratehiya sa epektibong pagsulbad sa problema.