LTO deputized agents

Dili g’yod ko gusto og abuso. Dunay report nga may pipila ka deputized agents sa Land Transportation Office-7 nga miabuso pinaagi sa pagpataka na lang og panakop sa mga drayber.

Buyno, wala man sab tingali’y manakop lang g’yod bisan walay sala. Ang sugyot ni Capitol consultant Byron Garcia nga ipataktak ang tanang mga LTO deputized agents mora’g mahulagway tingali nga “lahap” na usab kaayo.

Nasuko si Byron kay ang drayber sa sakyanan sa Kapitolyo gidakop man sa usa ka deputized agent nga nagdala sa ngalan nga “Neil Ong,” ang tinuod apleyido Ongluico Kini kunong maong agent nangayo ra usab og pasaylo ngadto ni Byron pinaagi sa text message.

Gibutyag ni Byron nga daghan karong mga LTO deputized agents nga mga sakop sa Filipino-Chinese families. Buyno, sa akong tan-aw wala may apan kun sila mga kaliwat og Insik kay gusto man sila nga motabang pagpahapsay sa atong kadalanan.

Tan-aw nako, mas maayo pa man gani tingali kining mga anak og Insik kay sigurado man ko nga duna silay panginabuhian o mga trabaho. Tungod niini, kun duna man gani’y magbinuang pinaagi sa pagpangilkil, maihap ra tingali sa tudlo.

Ang angay’ng bantayan ni higalang LTO regional director Alex Leyson mao ang report nga akong nadawat nga dunay mga “In-House deputized agents” sa LTO nga walay laing panginabuhian. Sa laktud walay trabaho.

Asa man sila og magasto? Buntag pa anaa na mag-standby sa LTO, unya takulahaw lang manglakaw ug mangatang sa mga sakyanan. Ang reklamo ni Byron, nindot, apan ang pag-awhag niya nga ang tanang mga LTO deputized agents taktakon, subra na usab.

Kun si Ongluico nakahimo og sayop, kana kun tinuod nga siya nangayo og pasaylo ni Byron pinaagi sa text message, angay nga si Ongluico maoy taktakon. Angay nga si direktor Leyson mohimo og imbestigasyon niini.

Angay’ng mahibaw-an usab ni Byron nga kini si Ongluico, dili sakop sa Task Force Alpha. Human mapublikar sa mantalaan ang maong isyu, gikontak nako si direktor Leyson ug naghimo ko’g pakisusi.

Nahibaw-an nako nga kini si Ongluico, dili sakop sa Task Force Alpha, kun dili sa Task Force Capitol.

* * *

Nakahukom si direktor Leyson nga dili g’yod bungkagon ang mga deputized agents. Hinuon, hashasan kini og maayo aron kadto rang mga tarong maoy ipabilin.

Daghan ko’g mga nailhan nga tarong diha sa mga deputized agents sama ni Joe Mendaros ug Harvey Osmeña, sila mga sakop sa Task Force Alpha. Ang mga ligdong nga sakop sa Task Force sama kanila maoy angay’ng padaghanon.

Gusto unta ko nga mahisama kanila, pero dili ko qualified kay dili ko gwapo. He! He! He! Bitaw, ug ako’y mahimong agent sa LTO, dali ra tingaling mahurot ang akong Temporary Operators Permit.

* * *

Walay lipod-lipod nga gibutyag ni ABC president Eugenio “Jingjing” Faelnar nga ang gitinguha nga ang mata’g barangay dunay “Firecracker Zone” diin adto magpabuto ang katawhan og rebentador lisud kaayo ipatuman.

Una, dunay mga barangay nga walay dagko nga mga luna nga adto makapabuto ang mga tawo. Ikaduha, lisud ug imposible nga ang mga tawo mobiya ra g’yod sa ilang mga dapit aron moadto sa “firecracker zone” sa tumong nga magpabuto.

Ikatulo ug maoy labaw’ng importante. Kadaghanan sa mga kapitan ug opisyal sa kabarangayan walay “political will” nga mopatuman sa mga lagda. Kini maoy pagaingnon nga kutob ra g’yod ta sa pangandoy.