EDITORYAL – Mapahunong ba ang pabuto?

Naninguha gihapon ang kagamhanan, ilabi na ang kapolisan, nga walay rebentador ang mobuto ning umaabot nga Pasko ug Bag-ong Tuig.

Gisublisubli nila kining paninguhaa apan pakyas sila sa kanunay.

Kining pagpabuto og rebentador ug paggamit sa uban pang pyrotechnic products nahimo nang tradisyon sa Pilipino. Malisud na kini pahunungon.

Hinuon seguradong mahunong kini kun ang kagamhanan adunay igong political will sa pagpapha sa mga pabrika sa pabuto. Ang source kun tinubdan sa problema (pabuto) maoy paninguhaon nga mapaundang sa ilang matang sa negosyo.

Apan mahimo kaha ni? Daghang baba ang nagsalig sa maong negosyo. Tingali ang maayong buhaton mao ang istriktong pagkontrolar o ba kaha pagregular sa industriya sa pabuto.

Nahimo kini sa Davao City, basin mahimo usab kini dinhi sa Cebu City.