Hilas-hilas sa medya

Mora'g nayabag na ang imbestigasyon sa tangkang kudeta ni Senador Antonio Trillanes dili pa lamang dugay gumikan kay daghan ang buot molihis sa dagan sa maong kaso. Imbis hinuon ang pag-walked out ni Trillanes, General Danilo Lim ug uban pang rebeldeng sundalo sa hearing sa ilang rebelyon ug pagmartsa ngadto sa Manila Peninsula Hotel ang angay tutokan sa mga imbestigador, nia man hinuoy pipila nga buot tadyakan ang otoridad gumikan kuno sa pagdakop sa mga taga medya atol sa maong hitabo.

Sa maong tangkang kudeta, ang mga polis na man hinuoy giinitan sa mga inilang “trapo,” ilabina ang pipila ka mga senador kinsa kugi karon ang paguwapo sa publiko alang sa 2010 elections, tungod lagi kuno sa pagposas sa mga sakop sa medya nga ni-cover sa maong hitabo.

Kini nagpakita lamang nga ang kapolisan na hinuon ang sad-an sa hinanggaw nga binuhatan ni Trillanes nga nakapaukay na usab sa mga Pilipino. Angay lamang nga masabtan sa ordinaryong mga Pilipino nga ang kapolisan igo lamang mipatuman sa ilang trabaho alang sa dinaliang kasulbaran sa  maong kaguliyang.

Ang pagdala sa pipila ka sakop sa medya ngadto sa kampo alang sa interogasyon mahitungod sa maong hitabo wala nagpasabot nga giyatakan na sa otoridad ang katungod ug kagawasan sa mga mamahayag. Usa kadto ka proseso nga angayan lamang buhaton sa otoridad gumikan sa rason nga ang pipila ka mga mamahayag wala motuman sa mando sa kapolisan pagpahawa sa maong hotel sa dihang miresponde sila aron pag-neutralize sa grupo ni Trillanes.

Ang uban usab kanato sa medya mora'g paminaw nila insakto na gayud sila sa ilang pagdumili sa mando sa otoridad pagpahawa sa maong hotel aron unta sa mas dali nga operasyon sa kapolisan. Wala nila hunahunaa nga dakong sagabal sa trabaho sa kapolisan ang ilang desisyon pagpabilin sa lugar sa maong hitabo kay aron lagi kuno makakuha og lab-as nga taho alang sa publiko.

Di man siguro importante nga makighalobilo pa ang medya sa mga rebelde'ng sundalo niadtong tungora aron lamang makasungkit og lab-as nga balita tungod kay delikado kaayo alang kanila ang pag-atake sa mirespondeng otoridad. Dili ba nga dunay pipila ka rebeldeng sundalo ang nakaikyas gumikan kay misagol sila sa medya pagpanggawas sa maong hotel?

Sa pagdala kanila ngadto sa kampo alang sa interogasyon, walay laing mabasol sa maong hitabo kondili mismo ang pipila ka sakop sa medya kinsa nagpatuo nga insakto na sila sa ilang gibuhat pagpabilin sa maong hotel bisan pa sa mando sa otoridad. Ug aduna ba silay katungod pagtiyabaw nga usa kadto ka pagyatak sa kagawasan sa pamamahayag?  

 Naghilas-hilas lamang sila tungod kay nagpakaaron-ingnon silang mas labaw pa sa otoridad niadtong tungora. Apan kon aduna gani dautang nahitabo sa ilang paghilas-hilas, di ba dayon lamang sila'g basol sa kapolisan?                                     

* * *

Dako ko'g pasalamat sa akong mga igsuon sa Alpha Theta Omega kinsa mitambong sa kasaulogan sa founding anniversary sa among fraternity didto sa usa ka beach resort sa dakbayan sa Lapu-Lapu kaniadtong Biyernes. Ubay-ubay gayud ka Althonians ang mitambong sa maong kasaulogan nga inubanan pa sa ilang mga pamilya.

Hinaut nga mas daghan pa ang manambong sa kasaulogan sa atong anibersaryo sa sunod tuig gumikan kay nakasiguro akong mas nindot pang mga aktibidades ang atong mapaabot.

Ug karong gabii sa Disyembre 15 (Sabado), usa ka dakong Christmas party sa Althonians ang ipahigayon didto sa harianong panimalay ni Brod Jun Epe sa Inayawan. Gitawagan ang tanang Althonians sa Visayas pagtambong sa maong dakong kalihokan tungod kay una pa lamang kini nga Christmas party sa atong fraternity.  

Ayaw kamo kalimot pagdala sa inyong mga pamilya tungod kay aduna kitay exchanging gifts sa mga bata ug dagko. So, magkita na lamang kita didto.     

Isip maoy presidente sa Althonians dinhi sa Visayas, dako ako'g pasalamat niadtong mga mikooperar alang sa kalamboan sa atong grupo. Hinaut unta nga padayon kitang moserbisyo sa atong komunidad alang sa kalamboan sa atong nasud.

* * *

Ipadala inyong reaksiyon sa [email protected]