Sorry kaayo amigo

Daghan ang wala makagusto sa gihimo ni Mayor Tomas R. Osmeña nga pagpugong nga maguba ang ubang tindahan kilid sa dalan B. Rodriguez nga gireklamo sa kadagkoan sa Vicente Sotto Memorial Medical Center.

Nadala si Mayor Osmeña sa hangyo ni Ermita barangay captain Felicisimo “Emok” Rupenta nga dili ipahinayon ang demolition sa mga tindahan sa sidewalk vendors. Ang maong dapit dili na sakop sa Ermita, apan mahibulong tingali mo no nganong nag-apil-apil si Emok?

Unsaon nga kini si Kapitan Emok opisyal man sa Cebu City United Vendors Association nga gipangulohan ni Maria Pino-Buanghug. Dihang ang mga sakop sa Squatters Prevention Encroachment Elimination Division nangguba sa mga tindahan basi sa kamandoan sa mayor, didto ko ug nakita nako sila si Maria ug Emok.

Gitug-anan ko ni Major Vicente Mercado, ang pangulo sa SPEED nga pwerteng hangyo kaniya ni Emok nga dili lang ihinayon ang pagpangguba sa mga tindahan sa ilang mga sakop.

Gibalibaran ni Mercado si Emok, apan wala na siya makabalibad dihang si Tommy na ang mimando sa pagpahunong sa demolition.

Diha nga bahina nga wala na ko makagusto sa gihimo ni Emok. Unsa may buot niya nga mahitabo, ang ubang barangay parehason nimo sa imong barangay Ermita nga pwerteng samoka?

Mireklamo na ang kadagkoan sa ospital kay ang ilang mga pasyente ug kabanayan sa mga pasyente nga mopaingon sa ospital, mabutang na sa peligro kay anha na man maglakaw sa karsada. Unsaon nga ang aseras naa may naninda.

Sa gibalik-balik na nako kaniadto pa, nga kining pagbaton og kahugpungan sa mga vendors maisip man god kini nga negosyo. Ang mga tindera nagbayad og “monthly dues” ngadto sa ilang mga lider sa grupo.

Ambot og giunsa nila sa mga lider sa CCUVA ang dakung kwarta nga matigum gikan sa monthly dues sa kaliboan nila ka sakop. Wala masayop ang usa ka opisyal sa City Hall nga mitumbok ni Maria-Pino nga usa sa nakapagrabe sa problema sa aseras.

Tug-anan ko kamo, higala nako kini sila si Maria Pino ug si Emok. Labaw na si Mayor Tommy, apan dili ko makalikay sa paghisgot niining maong isyu kay naglambigit kini og “public interest.”

* * *

Nabantayan nako nga daghang mga kompaniya ang sayo karong nanghatag sa ilang 13th Month Pay ngadto sa ilang mga kawani.

Ambot og may kalabotan ba kaha niini kadto pamahayag sa mga opisyal sa Department of Labor and Employment nga mohimo sila’g pakisusi kun ang mga kompaniya mohatag ba g’yod sa maong binipisyo sa dili pa ang Disyembre 21.

Daygon nako ang tagdumala sa DYLA ug The Freeman nga mituman g’yod sila sa awhag sa DOLE nga ang ilang mga kawani hatagan pagsayo sa ilang 13th Month Pay.

Wala god ko magdahum nga kaniadtong Miyerkules nakadawat ko og text message gikan sa among administrative officer sa DYLA nga nagpahibalo nga ipakuha na ang among binipisyo.

Unya, kagahapon ang The Freeman nanghatag na usab sa mga 13th Month Pay sa mga kawani. Sa ngalan sa mga kawani niining maong mga balay-patigayon, ako maoy magpasalamat ngadto sa mga hingtungdan.

Apan samtang ang mga kawani niining duha ka balay-patigayon nanghatag pagsayo sa 13th Month Pay sa ilang mga kawani, ang uban kaha, mituman ba kaha?

Hinoon tan-aw nako mora’g dili kaayo alkanse ang mga tagdumala sa balay-patigayon karong tuiga kun itandi nato sa nangaging katuigan. Matud pa sa uban nga arang-arang ang atong Pasko karon.