Kinahanglan kadtong tambag ni Bise Mayor Mike Rama ngadto sa mga drayber sa police cars nga magmatngon sa kanunay sa ilang pagmaneho og sakyanan.
Ubay-ubay nang mga sakyanan sa polis ang naaksidente samtang kini gimanehog polis.
Giawhag ni Bise Mayor Rama ang mga polis nga nagmanehog patrol cars sa pagtuon og defensive driving. Usa kini ka matang sa pagmaneho diin gikinahanglan ang dakong pagmatngon dala usab ang pagrespetar sa katungod sa ubang drayber.
Ambot kun nakasabot ba ang mga drayber sa kapolisan sa defensive driving.
Tungod kay nagmaneho sila’g sakyanan sa polis dili pagasabton nga libre ra sila sa pagpadagan sa kotse nga mora bag sila’y tag-iya sa dan.
Respetahan sab ang katungod sa civilian nga mga drayber kay sa ingon kalikayan ang disgrasya.
Bisna pa kun nagtubag og alarma, kinahanglan gihapon ang defensive driving, kini suma pa sa mga beteranong drayber sa polis patrol cars.