EDITORYAL - Paghandum kang Serging

Karong adlawa, Disyembre 4, kasumaran sa ika-91 ka tuig sa adlaw’ng natawhan ni Serging Osmeña, ang inilang Nino Bonito ug Political Legend sa Sugbu.

Kinahanglan lang nga handumon sa mga Sugbuanon si Serging tungod sa daghang mga mehoras nga iyang napabuhagay dinhi sa Sugbu sud sa iyang pagka gobernador, mayor, kongresista ug senador.

Si Serging (“Tawaga lang kong Serging,” matud niya ngadto sa usa ka periodista gikan sa Davao kinsa nangutana kaniya unsa may gusto niyang i-address ngadto kaniya, mayor ba, senador ba ug umaabot ba nga presidente sa nasud), maoy giilang amahan sa mga dagkong proyekto sa Sugbu. Siya ang nagpasiugda sa North Reclamation Project, Mactan airport, unang Mandaue-Mactan bridge, ug uban pa.

Kining  maong mga proyekto nakatabang og dako sa kalambuan sa Sugbu diin nahimo kining maong siyudad nga usa sa labing mauswagong dakbayan sa nasud ug sa tibuok pa gani sa Southeast Asia.