Suma pa sa usa ka komentarista sa radyo dili na kinahanglan nga debatihon pa kun silotan ba o dili si Senador Antonio Trillanes gumikan sa gimugna niyang kagubot didto sa Makati City adtong miaging Huwebes.
Kinahanglan kuno nga ihapak kaniya ang “full force of the law” sama sa giingon sa Presidente.
Tinuod. Dili na kinahanglan nga debatihon pa kun silotan ba o dili si Trillanes.
Adtong Huwebes, klaro kaayo nga daghang salaod nga nahimo ang senador-sundawo diin ang labing bug-at niini mao ang iyang pag-awhag sa katawhan, lakip na ang kasundalohan, sa pagpaluyo sa iyang tinguha nga mapukan ang kagamhanan ni Presidente Gloria Arroyo.
Nahimong wala nay bili ang husgado dihang iyang gitalikdan sa iya rang kagustohan atol sa bista sa iyang kaso nga rebelyon.
Iyang gidaut ang lehitimong pamatigayon sa Makati dihang iyang giilog ang usa sa labing luho nga hotel sa nasud diin miresulta kini sa dakong alkanse.
Oo, di na kinahanglan debatihon pa kun silotan ba o dili si Trillanes.