Gikan sa cellphone number 0919-2092854: “Maayong buntag. Naa lang unta koy ipahibalo. Kining garbage collector sa Pajo, Lapulapu City kay moreklamo sila kun daghan ang basura. Pero hatagan gani sila og padangog dili na sila moreklamo. Kami gani kay dili man mohatag magpasuko-suko sila.” — (Sent:11:51am—Nov. 9, 2007)
Unsa man nang mga collector nga imong giingon, higalang texter? Sa siyudad ba sa Lapulapu ug garbage collector mismo sa barangay Pajo? Maayo unta kadto kun imo pang giklaro aron sayon ra nato silang ipadukol sa ilang mga amo.
Tulibagbag man god kaayong paminawon kun tinuod man ugaling kining alegasyon sa atong texter. Tiaw bay magbagulbol o moreklamo kun daghan ang hiposon nilang mga basura. Pero kun dunay “padangog” mohilom na sila!
Dako kining binuang kun tinuod man. Nganong kinahanglan pa man nga dunay padangog nga obligasyon man nila ang pagkolektag mga basura kay mao man kiniy ilang trabaho. Wala ba diay sila makasabot kun unsay kahulogan sa “garbage collector”?
Maayong masusi kun hain nga garbage collector ang mangolekta pod og padangog? Ang collector ba sa siyudad o sa barangay Pajo? Labing maayong mabadlong sila kay dili maayo ang ilang gibuhat. Padangog god ‘tawon!
* * *
Ang tag-iya sa cellphone number 0910-6296115 mitaho nga adunay video karera operations diha sa may 6th St., Gil Tudtod, Mabolo, Cebu City. Angayan ning susihon sa mga awtoridad aron masuta kun unsa kini ka tinuod.
Gitumbok sa atong texter nga ang operations sa video karera sa maong lugar mao sab ang hinungdan sa daghang mga panghitabo sa pagpangawat sa nahisgotang dapit. Gusto sa atong texter nga mahunong na ang pag-operate sa video karera diha sa 6th St., Gil Tudtud, Mabolo ning siyudad.
Atong hangyoon ang proper authorities sa pag-counter check ning maong taho. Sumala sa atong texter, usa ka Pina ang caretaker sa video karera. Angayang susihon kun unsa kini ka tinuod.
(Sumbong ug reklamo? Text sa 0910-8105522).