Ang Dios Miingon
Pamalandong Matag Domingo
Nobiyembre 25, 2007: Solemnidad ni Cristong Hari
Mga Pagbasa: 2 Sam. 5:1-3/Sal. 122/Col. 1:12-20/Lk. 23:35-43
Sa dihang gitagik ko kining maong pamalandong misantop sa akong hunahuna ang kalainan sa kinabuhi nako kaniadto ug sa kinabuhi nako karon. Kaniadto anaa ra ako sa suok, halos dili gani motingog gawas na lang kun duna ako’y dakong pagsupak sa mga pamaagi sa mga hamtong sa akong palibot. Kaniadto kun ako mosugyot ako ingnon man nilang maot kay lagi bata pa ug walay kangho. Karon nga ako pari na, kadtong mga hamtong nga sa akong mga opinyon midumili ang karon gayud kanako mangutana. Dili tungod kay ako maalamon na kundili sa yanong rason nga ako pari na. Dili ang akong pagka-ako ang ilang giduol kundili ang nadugang sa akong pagka-ako: “ANG PAGKAPARING inambitan lamang gikan sa GINOO.
Ingon ini gyud tingali ang balansayon sa kalibutan. Motuo kita sa kinaadman kun kini mosalamin kuno sa estado sa usa ka tawo diha sa katilingban. Sa laktod nga pagkasulti ang usa ka HARI maila nga gamhanan kun siya atong hikit-an nga naghupot sa mga sukaranan sa tawhanong Pagkagamhanan (Bahandi, Gahom, Kasikat). Mao nga daghan nato ang buot mohakgom kanila kutob sa mahimo aron kita makaasdang sa paspas nga kompetisyon ning atong kalibutan. Mas luoy ang mga huyang ug mas pabor ang mga gamhanan. Kay ang mga gamhanan maningkamot man nga maghinatagay sila sa gahom aron kini dili masakmit gikan sa uban.
Karon, Solemnidad ni Cristong Hari. Apan sukwahi ang atong madungog sa ebanghelyo karon. Hari tuod siya apan siya gibugal-bugalan ug gipahamtangan sa kamatayong ubos kaayo ug brutal. Apan lahi gyud ang mga mata sa kalibutan sanglit kun ang krus mao man ang kaulawan, alang sa atong Hari, ang Krus mao ang iyang kadaugan nga migun-ob sa pwersa sa Dautan.
Nindot ang implikasyon niini alang kanato. Kini ang molangkob ning mosunod:
1. Ang mga anaa sa pangatungdanan ang motan-aw unta sa gahom nila ingon nga ilang responsibilidad inay garbo lamang. (Mao na ni ron, unsay motibasyon sa amahan nga moapas og usa ka libo aron anak niya modaog sa SK Elections?). O dili ba kaha atong palisngagon ang ilong diha sa pagpahimug-at nga ikaw lang gyud ang magbuot sa kapasikaran nga ikaw mao ang lider sa mga tawo nga daw imong gitratar daw mga tuta?
2. Dili dautan ang mangindahay og mas dagko pang ang-ang sa kahibalo, apan alang sa unsa man? Aron ingnon ka nga Lantip tungod sa diploma mo? (Hibaw-i nga dunay mga tulunghaan nga mohatag sab og pasidungog bisan na gani sa iro).
3. Kay lagi ikaw utokan, mao nga ang uban sa ilang kayano imo na lang suphon kay lagi ikaw makamao, wala ka ba masayud nga ikaw tuldok lang sa kawanangan?
Daghan pa unta ako’g itagik pa apan husto na tingaling atong maalinggatan nga ang sayop nga panlantaw sa tawhanong kabantog ang magdala usab og kalaglagan. Si Cristo midaog dili tungod sa iyang pagpasiatab kundili tungod sa iyang malumong mga buhat ug gugma. Kun ang little learning is dangerous, ang tawong nagtuong ALL-KNOWING is ANOMALOUS!
* * *
E-mail: paiskaris@yahoo.com