EDITORYAL - Silotan ang nakasa
Pito ka mga menor de edad nga nadetiner sa Operation Second Chance facility ang mipuga atol sa pag-igo sa Sugbu sa bagyong Lando.
Ang hinungdan, suma pa sa usa sa mga pugante nga mitugyan sa iyang kaugalingon didto sa balay ni Mayor Tomas Osmeña, mao ang kamadagmalon kuno sa mga polis nga nagbantay kanila sud sa maong pasilidad.
Gisaysay sa maong batan-on ang mga pagdagmal kaniya ug sa iyang kaubanan atol sa iyang pag-atubang ni Mrs. Margot Osmeña, co-chairperson sa Task Force on Street Children.
Karon kay nasayud na si Mrs. Osmeña sa pagpangdagmal sa mga polis ngadto sa mga menor de edad nga inmates sa Operation Second Chance facility nagpaabot ang publiko nga kapahamtangan og nagkaigong silot ang mga nakalapas sa balaod diin ang katungod sa mga menor giprotektahan.
Sayud kami nga si Mrs. Osmeña sinsero sa iyang pag-atiman sa mga kabus nga mga bata sa siyudad busa masaligon usab kami nga iyang hatagan og dinalian ug saktong aksyon kining sumbong sa kabataang dinagmalan.
- Latest
- Trending
