Sa sinugdan nakahunahuna ko nga dili ipatik ang kasayoran nga gihatag nako sa usa ka texter sa katarongan nga bisan usa lang kini ka false alarm. Apan sa kadugayan, misantop sa akong kahimungawong nga dili makiangayon kun dili nako palutson ang usa ka impormasyon nga makatabang unta sa mga tinugyanan sa balaod ug sa tagdumala sa BBRC pagsumpo sa drugas nga giingong nakasulod sa maong prisohan. Mao nga sa kapulihay, nakahukom kong ipatik ang text.
Ang text nagkanayon: “Good Am, Orie. Naa lang koy isulti nimo bahin niining drug pusher sulod sa BBRC. Ngano man kaha nga makasulod ang drugas sa prisohan? Segun sa impormasyon nga akong nasayran naa kunoy amo ang inmate nga responsable sa pagsulod sa drugas diha. Kun unsa kana ka tinuod, maayo seguro nga papanid-an og taga PDEA.” -- 0906-2363176 (Sent: 10:55:58am-- November 4, 2007)
Una sa tanan, angay sutaon kun tinuod bang nakasulod na ang ginadiling drugas diha sa BBRC. Usahay ra ba dunay isyu nga “haka-haka” lang, sa Tinagalog pa. Pero kun tinuod man, labing maayo nga subayon kun kinsay responsable sa pagsulod sa drugas sa bilanggoan. Ang atong texter nag-ingon nga usa ka inmate ang responsable niini. Angay ilhon kun kinsa ang maong inmate. Sa higayon nga mailhan na siya, patug-anon kon kinsa ang iyang amo. Kana lang!
* * *
Ang tag-iya sa cellphone number 0920-4023185 mi-text nako nga dunay duha ka dagkong bus compay nga nag-operate sa Sugbu nga mipasaka sa ilang plitehan sa miaging Kalag-kalag. Dako gyud kaayo ang pagsaka sa plitehan!
“Ang regular fare P50 ra pero diha sa Kalag-kalag ang ilang gikolekta kay P150. Mahal kaayo. Kada naay okasyon ingon ini ilang buhaton,” nagkanayon ang texter.
Sobra na usab kaayo ang pagpasaka sa maong plitehan. Makagaba na man ang maong ginansiya. Kun tinuod kini, mas maayong makaabot kini sa proper authorities. Akong hagiton ang mga pasahero nga nakasinatig ingon niini sa pagreklamo. Dad-a ang inyong mga tiket ngadto sa buhatan sa transportasyon pagmatuod nga biktima kamo sa overcharging. Kinahanglang magpakabana kita aron dili ta abusohan pag-ayo.
* * *
(Sumbong ug reklamo? Text sa 0910-8105522).