Extortion diri, extortion didto. Morag nauso na kining maong paagi sa pagpangwarta.
Pagpangilkil, pagpangotong. Mao na roy gihimo sa daghang badlongong sakop sa atong katilingban. Daghan na ang nalambigit kun misagop sa maong matang sa panginabuhi.
Daghang mga balita sa pamantalaan, telebisyon ug radyo diin gikareport nga dunay mga polis nga nangilkil.
Kini klarong giangkon sa dagkong opisyal sa kapolisan kinsa milusad na gani og kampanya batok sa gitawag nga “Kotong Cops.”
Bisan pa gani sa Kongreso dunay pipila ka mga miyembro niini nga giakusahang mihimo’g buhat nga mahimong tawgong extortion ug ang gibiktima mao kadtong mga opisyal ra usab sa kagamhanan. Kini gibutyag sa usa ka cabinet appointee nga gilisudlisud sa iyang confirmation.
Gawas niining mga dinagkong extortion, naa say mga ginagmay diin ang mga suspek niini mga empleyado sa local governments (LGU).
Ipadayon na ba lang nato kining maong salawayon nga buhat hangtod mamahimo na kini nga usa ka kultura sa atong nasud?