Pakyaw

Maayo gyod kaayong magpapating ang mga taxi driver nga mosugat sa mga pasahero sa barko diha sa Pier 1. Kapila na nato sawaya dinhi sa atong lindog kanang ilang kalaki nga dili mogamit og metro sa ilang  pagpamasahero  kay maoy ilang gusto ang pagkyaw-pakyaw. Pero hangtod karon, nagpadayon diay gihapon sila sa pagpasalir sa mao nilang tinonto. Kapating gyod og mga dagway, uy!

Usa ka magbabasa ning lindog mi-text nga nagkanayon: "Good day, Sir. Kana bang mga driver sa taxi sa Pier 1, di man na sila mogamit og meter. Ingnon man dayon ka nga pakyaw. Usa ko sa nakasulay niini. Wala gyoy nakabadlong niini nila. Natagbaw intawon mig pangita og laing taxi nga mosugot og meter.'' -- 0928-6662172 (Sent: 09:52:24 am -- October 5, 2007)

* * *

Sa sunod, kun makasugat mog panghitabo nga ingon niini sa inyong pagpanakay og taxi, kuhaag seguro ang ngalan sa taxi, plate number ug mas maayo kon malakip ang ngalan sa driver. Ayaw gyod ninyo i-tolerate. Isumbong ang maong driver sa buhatan sa transportation. Dakong kalapasan ang dili paggamit sa meter sa taxi sa ilang pagpamasahero busa ayaw gyod mo patonto nianang bentahosong mga taxi driver.

Nakasaksi sab ko   sa tinonto sa mga taxi driver nga gustog pakyaw-pakyaw. Duna na silay dispatser o canvasser nga magpaila ngadto sa mga pasahero nga usa siya ka barangay tanod. Ambot kon tanod ba gyod na siyang tinuod. Kanang tawhana maoy manganbas og pasahero para sa mga taxi driver nga gustog pakyaw-pakyaw.

* * *

Sa laing bahin: "Sir, naay cellshop diri sa Yati, Liloan nga makalagot kaayo. Kun naay magpaayo og cellphone, inigkuha sa gipaayo kay gipang-ilisan na ang mga piyesa sa ilawom. Mailhan man kay dili na mao ang serial number." -- 0906-8013938 (Sent: 07:20:09 am -- October 5, 2007)

Gihatag sa atong texter ang ngalan sa maong cellshop apan ato lang unang gipugngan in fairness sab ngadto sa tag-iya niini. Ang inisyal nga ngalan niini mao ang J. Ayaw mog kompiyansa sa maong cellshop kay buringog diay ang mga technician diha. Ngadto sa tag-iya, labing maayo nga tarongon mog dumala ang imong negosyo.

(Sumbong ug reklamo? Text sa 0910-8105522)