Ang naglahong paruparo

(Ang tulang ito ay binigkas ng awtor sa huling gabi

ng lamay ng kanyang kapatid na si Engr.

Artemio B. Magadia noong Nob. 3, 2007.)

Ako’y isang paruparo – sa malayo pa nagbuhat

at kung kaya naparito ay mayroong hinahanap,

Paruparong kapatid ko na mabilis kung lumipad

ay ano ba’t isang gab’y naglaho at sukat;

Kung saan Siya nakasapit ay hindi ko madalumat

kaya wasak yaring puso at sakbibi ng bagabag!

Ginalugad ko ang bundok at ang dagat ay sinisid

Sa  hangaring masilayan ang kapatid na nawaglit,

Walang humpay ang paglipad ang Project 6 ay nasapit

sa tabi ng Kanyang bahay doon ako ay gumilid

at doon nga sa bulwagan na lubha pang mapang-akit

sa wakas ay natagpuan ang kapatid na umalis!

Ang kapatid na naglaho’y natagpuan sa bulwagan

kaya ako ay pumasok na ang dala’y pagmamahal’

Ang bulwagan nang pasukin ay una kong napagmasdan

bulaklak na kay babango – maningning na mga ilaw;

At nang ako ay sumilip sa may gitna ng bulwagan

nakita ko si kapatid na wari bang nalulumbay!

Akala ko’y natutulog kaya ako’y dumistansiya

nagbantulot na lumapit baka siya ay pagod pa;

Damit niya’y puting-puti at pikit ang mga mata

habang siya’y minamasdan napansin kong lumbay siya

Kaya ako ay lumapit at tiniyak lagay niya

hindi pa rin kumikilos – siya pala ay patay na!

Ah siya nga ay patay na’t ang asawa’t mga anak

napansin kong lumuluha sila’y pawang umiiyak

Pagka’t hindi ko matiis na madamay kayong lahat

pinigil ko ang pagtulo ng luha kong bumubulwak;

at sapagka’t ako’y bunso mas malakas ang pag-iyak

Kuya ako’y inunahang sa kay Inay ay yumakap!

Pagka’t ako ay kapatid na nawalay sa piling n’ya

ang lukso ng aming dugo napagtanto na iisa;

Noong ako’y nag-aaral trabaho n’ya ay kay ganda

kaya ako’y humihingi ng tulong at saka pera

At sapagka’t ako’y bunso ang takbuha’y tanging siya

hindi siya nagdaramot, may pera na’y may kain pa!

At nang siya’y magkasakit – dumaraing na sa hirap

dahil ako ay malayo pangalan ko’y tinatawag;

“Dading! Dading!” kung pakinggan ay kay sarap

ngunit pagka’t malayo nga lambing niya’y di natanggap;

Kuya Temyong , narito na ang kapatid mong naglayag

ngayong tayo ay magkita – di na kita mayayakap!

Ilan tayo Kuya Temyong? Tayo’y pito nang isilang

Lima kayong umalis na dalwa na lang ang matibay’

Si Belen at saka ako ginusto mo na maiwan

Upang sa ‘yong inulila – nakahandang pag-utusan

Sa asawa’t mga anak kami’y handang umalalay

At sa iyong mga apo – ay pwede ring paglambingan!