Karaang estilo sa modus

Ang karaang estilo sa pangilad mosalir kun dili kita makabantay. Nasuta nato nga nagbalik-balik ra ning estilo sa modus operandi sa mga mangingilad pero daghan man gihapon ang nailad. Busa, angay kitang masayod sa lainlaing estilo sa pangilad.

Usa ka magbabasa ning kolum mi-text nga nagkanayon: “Good day, Sir. Naa koy isumbong bahin sa modus nga karaan na kaayong estiloha. Diri sa Yati, Liloan naabot ang mga mangingilad, ang budol-budol gang. Usa ka babaye nagpakaaron-ingnong na-flat ang ligid sa iyang sakyanan unya kun ikaw daghan og alahas iya dayon kang duolon aron magpatabang og pangita og trak para mobira sa iyang sakyanan. Pila ray estorya, iyang ibilin nimo ang kuwarta nga iabang kunog sakyanan. Pero iyang kuhaon ang tanang alahas nimo aron kuno nga dili gyud ka molakaw ug dili nimo ablihan ang putos sa iyang kuwarta. Dayon molakaw siya. Dili na siya mobalik mao nga imo na lang ablihan ang putos. Imo na lang mahibaloan nga peke ang kuwarta nga giputos. Nailad na ko niini.” -- 0922-5542008 (Sent: 01:34:46am--Oct. 18, 2007)

Daghang salamat sa detalyado kaayo nimong pagpaambit sa imong kasinatian. Hinaot unta nga kining imong experience makahatag og pagtulon-an ngadto sa atong kaigsuonan aron makalikay sila sa mga mangingilad. Kining budol-budol gang bantayanan kaayo kay moatake sila sa panahon nga wala nato paabota.

* * *

“Good day, Sir. Reklamo lang ko sa nagpuyo diri sa reclamation area. Ang kanal gipang-alihan og bato. Inig-ulan ang tubig dili na makadagan. Magpundo na lang mao nga magbaha diri. Hasol kaayo alang sa mga trabahante.” -- 0926-2341260 (Sent: 07:29:13am--October 17, 2007)

Dili maayong alihan ang mga agianan sa tubig. Angay ganing ampingan nga dili kini mapuno sa mga gapnod aron dili mabara nga maoy hinungdan sa paglunop. Hinaot unta nga makuha na kanang mga bato nga giali sa mga kanal diha sa reclamation area aron hapsay na ang pagdagan sa tubig ug dili na maglunop kun mag-ulan. Katungod natong tanan ang pagmintinar sa mga drainage system aron dili mobara.

 (Sumbong ug reklamo? Text sa 0910-8105522).