Nagbaha sa akong cellphone ang reklamo sa mga tawo nga gikuha sa taga National Statistics Office kon NSO sa pagpahigayon sa Censos kaniadtong miaging buwan. Adunay nagreklamo nga nagpaila sa ilang kaugalingon samtang aduna usay nagtago sa ilang kaugalingon. Daghan silang nagreklamo diri kanato apan usa ra ang ilang reklamo ug kana mao ang giutang nga bayad sa ilang serbisyo. Ambot ug unsay hinungdan nganong hangtod karon wa pa gihapon mabayari sa kadagkoan sa National Statistics Office ang ilang suholan.
* * *
Hoy-hoy ang abaga sa mga magtutudlo nga miserbisyo sa piniliay kaniadtong Oktubre 29 ning tuiga kini human ibani ang honorarium nga ilang nadawat gikan sa 2000 pesos ngadto na sa tag 1,5000 na lamang ka pesos.
* * *
Gipasusi na ni Sr. Supt. Patrocinio Comendador sa CIIB ang reklamo sa mga kabanay ni Noel Tortor batok sa upat ka mga police sa Fuente Police Station kinsa gipasanginlan nga nanapi ngadto sa ilang dinakpan nga si Noel Tortor. Matod pa sa taho, 150,000 ang gipangayo sa upat ka mga police. Apan kay wa sila makahatag gipasaka gayod ang kasong paghupot og armas ug ginadili nga drugas. Ang nakadaot lang ning maong reklamo kay ang reklamante nagdumili sa pagpirma og affidavit pagpamatood sa mga pasangil nga iyang gibaro ngadto sa mga police.
* * *
Gisugyot ni kanhi presidente Joseph Estrada ngadto sa administrasyong Arroyo ang paghimong legal sa sugal nga jueteng didto sa Central. Apan ang maong sugyot gisupak sa iyang mga anak. Kung sagupon man sa administrasyong Arroyo ang sugyot ni Erap, dinhi atong makonsiderar nga ang atong gobyerno misurender na ngadto sa mga sugarol.