Nagkahinabi kami kagahapon ug si Lorega-San Miguel barangay captain-elect Lorenzo “Larry” Monsanto.
Gitug-anan ko niya sa iyang plano nga ininglis na ang gamitong pinulongan sa ilang sesyon sa barangay.
Pastilan, og madayon kini, duna g’yoy mga konsehal nga mahimutang lang sa kataw-anan. Nalipay ko kay gitug-anan kong Monsanto nga sundon g’yod niya ang parliamentary procedures sa pagpahigayon og sesyon.
Paminaw nako, duna g’yoy bag-ong komitiba nga mamugna. Kini mao ang committee on silence.
Matud pang Monsanto nga kaniadto, usa ka konsehal nga gara-garaon kaayo, mihangyo tawon nga magbinisaya lang sila kay dili siya makamaong mo-ininglis. Wala ka kulba-i bay?
Daghan g’yong mga anomaliya ang madiskobrehan unya sa bag-ong administrasyon.
* * *
Bilib g’yod ko aning Mayor Tommy Osmeña. Ang akong isyu nga gibulgar kabahin sa usa ka sindikato nga mopugos sa mga tindera nga paabangon og lantay alang sa ilang mga baligya, gihatagan na og pagtagad og misangpot og kaayohan sa mga tindera.
Gipatawag kagahapon ni market administrator Raquel Arce ang 18 ka tawo nga nagnegosyo pinaagi sa pagpaabang og mga lantay. Siyam ra hinoon ang mitunga sa tigum apan nakonpirmar g’yod nga tinuod ang akong gibulgar sa balita.
Ang ila god nga modus mao nga ang daplin sa karsada, butangan na nilang daan og mga lantay. Kini aron nga ang mga tindera walay laing mahimo gawas sa pag-abang sa ilang lantay.
Unsaon nga kun dili ka moabang, dili ka man tugotan nga makabaligya sa imong produkto. Kinsa man go’y mga tindera nga dili mahadlok nga daghan man og mga bata-bata ang mga tag-iya og lantay.
Miapil ko pagpasabot sa maong mga tawo kagahapon nga dili maayo nga pugson nila pagpaabang kadtong mga tindera nga nangyawat intawon nga makatigum og pipila ka pesos sa ilang pagpaninda.
Duna man g’yoy mga tindera nga dili gusto nga moabang og lantay aron makadaginot. Sayonan ka nga kun ang ilang kita maibanan og P20 alang sa lantay, may lain pa man silang bayranan sa abang na usab sa timbangan.
Grabe lagi ang sindikato diha sa Carbon. Dunay laing mga grupo nga mopugos usab sa mga tindera nga ang ilang timbangan maoy gamiton, ug dili mosugot nga ang tindera magdala og timbangan.
May lain usab nga binuang mao nga pugson usab ang ubang tindera og isda nga moabang sila og banyera nga sudlanan sa ilang mga baligya.
Nalipay na lang ko kay mibarug gayod si Ma’am Raquel Arce ug Konsehal-elect Maria Pino-Buanghug nga ihunong na ang maong binuang. Nauyonan nga ang mga tag-iya og lantay dili na tugotan nga molapag daan sa ilang lantay kun walay tindera nga mogamit.
Gipasabot nako ang maong mga tag-iya og lantay nga makahimo sila pagpadayon sa ilang negosyo, apan dili maayo nga pugson nila ang mga tindera nga moabang kanila og lantay.
Mireklamo unta ang pipila sa maong mga tigpaabang og lantay sa paghingalan nako nga sindikato ang ilang grupo apan wala na makatingog dihang akong gitug-anan nga ang usa, duha o tulo ka tawo, ilabi na og maghimo’g binuang, maisip nga sindikato.
Ang akong mensahe mao kini. Kun dunay mga binuang nga makaapekto sa kinabag-ang katawhan, kaming mga sakop sa media mapugos gayod sa pagtuki aron kini masanta. Busa, putla na ang mga binuang.
Salamat usab ni Ma’am Raquel nga abtik kaayong miaksyon sa mando ni Mayor Tommy nga imbistigahon ang maong isyu nga akong gibulgar.