October 21, 2007 | 12:00am
Daghan na kaayo ang nahadlok kang Waway. Gipalabaw-labawan man god ang estorya. Gipakapinkapinan. Gawas nga gi-sensationalize, grabe gyud ang mga atraso nga gipasangil nga nabuhat niya. Apan ang kapolisan nag-ingon nga dili tinuod nga serial killer si Waway. Dili tinuod nga daghan na siya’g napatay.
Usa ka texter nagkanayon: “Maayong buntag. Magpatabang lang unta ko about niining serial killer nga si Waway nga taga Danao nga manglugos. Naabot na man na siya diri sa Opon. Nganong wala na siya dakpa o seryosoha paggukod sa kapolisan nga very dangerous man na siya? Alarming kaayo na sa amoa diri. Luoy kaayo ang mga nerbiyosa kay dili makatulog. Gawas pa, ang mo-duty nga panggabii nga moagi sa ngitngit mangahadlok. Naa kuno na siya’y anting-anting. Kun makasimhot daw sa sinina makasulod na daw sa balay bisan serado.” -- 0921-2300492 (Sent: 12:14:27pm--Oct. 16, 2007)
Ang tinuod, gihugtan na sa kapolisan ang pagpangita ni Waway. Dili siya usa ka serial killer pero may salaod siyang nahimo. Kanang bahin sa anting-anting, tinuod kini alang sa motuo. Apan dili ta angay mag-panic. Duna man goy mga tawo nga mosakay sa panahon aron mangahadlok pag-ayo ang katawhan. Walay makalabaw sa gahom sa Dios. Walay basehanan nang giingon nga may anting-anting si Waway.
Laing text nagkanayon: “Good day. Usa ko sa tigbasahan sa Modus. Gusto kong awhagon ang mga hingtungdan labina ang mga polis nga unta magpakatap sila og hulagway ni Waway dinhi sa Cebu City. Daghan na ang nangahadlok niini. Duol ra ang Lapulapu dinhi. Daghang salamat.” -- 0906-6014028 (Sent: 11:12:25am--Oct. 17, 2007)
May lain pa gyud: “Good day. Concern lang ko labina sa taga Lapulapu about ni Waway. Ayaw lang mog tuo sa balita kay karong panahona daghan gyud mga binuang labina hapit na ang Kalag-kalag. Ikalipay og dako sa mga bugoy kun magbuhat silag daotan sama sa rape ug kawat kay si Waway ang mapasanginlan.” -- 0921-4983444 (Sent: 07:39:06pm--October 17, 2007)
Husto ka sa imong punto, higala. Pero dili sab nato i-discount ang posibilidad nga nakaabot na si Waway sa Lapulapu. Dili lang gyud ta mokompiyansa.
* * *
(Sumbong ug reklamo? Text sa 0910-8105522).
