Isnatser sa Carmen

Kun nagtuo mo nga sa mga dakbayan ra nag-operate ang mga isnatser, dako mong sayop. Aduna sab diay mga isnatser nga naglihok sa kalungsoran. Labing maayo nga makabantay ang atong kaigsuonan mahitungod niini aron dili sila mabiktima.

Usa ka magbabasa ning lindog mi-text nga nagkanayon: “Good day, Sir. Gusto unta ko nga maaksiyonan na ning sige’g pangisnats og cellphone diri sa Carmen, Cebu. Wala gyoy mahimo ang biktima kay mag-motor man ni sila. Ang mga polis mora ra man og walay gihimo kalabot niini.” -- 0920-7463457 (Sent: 09:18:20am-- Oct. 10, 2007)

In fairness ngadto sa kapolisan sa Carmen, basin wala silay kasayoran mahitungod niini maong wala kini nila himoig aksiyon. Ako gani karon pa man sab makadungog nga may isnatser na diay diha sa maong lungsod. Sa ako gong nasayran, malinawon ug mauswagon man kaayo kining maong lungsod.

Atong awhagon ang mga biktima sa mga isnatser diha sa Carmen nga magpa-blotter gayod ngadto sa buhatan sa kapolisan. Sa ingon niining paagi, mahimoan og lakang sa kapolisan ang nahitabong pagpangisnats. Pinaagi sa paghulagway sa biktima sa isnatser nga mabiktima niya, makabaton og lead ang kapolisan kun unsay ilang buhaton aron mailhan ug madakpan ang maong badlongon sa katilingban.

Alang sa atong kaigsuonan, labing maayo nga dili gyud mo mokompiyansa aron dili mo mabiktima sa mga isnatser nga naglihok diha sa Carmen. Magsakay ra ba kunog motorsiklo kining maong mga badlongon. Pagbantay gyud mo!

* * *

Hangtod karon nagpadayon pa gihapon ang text scam. Lisod man god kaayong sulbaron kining maong tinonto. Ang naggamit sa cellphone number 0906-9624333 mi-text nako ug nagpahibalo nga siya mismo nakadawat og congratulatory message dili pa lang dugay. Ang nag-text niya nag-ingon nga nakadaog (kuno) siya’g P900,000 sa 23rd anniversary sa Charity raffle nga gipahigayon didto sa kaulohan. Patawgon kuno siya sa cellphone number sa usa ka abogado aron pag-claim sa iyang premyo.

Maayo gani kay wala motuman ang atong texter sa instruction sa nag-text niya maong wala siya mailad. Kamo diha, ayaw sab mo pailad sa text scam.

 (Sumbong ug reklamo? Text sa 0910-8105522).