EDITORYAL - Padak-an ang budget sa BFP

Usa ka sakop sa atong kabomberohan nagkanayon nga kitang mga Pilipino “more concerned with their security than with their safety.”

Mao kuno tingali kini nga mas dako ang igahin nga budget sa gobiyerno ngadto sa kapolisan ug sa military, samtang menos ra ang budget alang sa Bureau of Fire Protection.

Nalimtan tuod sa atong gobiyerno ang panultihon nga nag-ingon: “Bahala nalang og makawatan kita sa makadaghan, basta dili lang gyud kita masunogan.”

Tinuod kini. Ug tingali nakaamgo usab ang kadagkuan ta sa kagamhanan. Apan nganong gamay ra man ang budget nga ilang ihatag ngadto sa BFP?

Tungod sa nagkadaghan na ang kaso sa sunog diin minilyon nga kabtangan ang nangaabo ug kinabuhing nangakalas, panahon na nga padak-an ang budget sa bombero.

Tuod, importante ang “security” apan importante usab ang “safety” sa katawhan.