EDITORYAL – Aron motunhay ang kalinaw

Gihagit sa kapolisan ang mga lider sa fraternity ug gang dinhi sa Sugbu sa pagpakita sa ilang liderato sa ilang masigka-pundok alang sa kaayuhan sa komunidad ug sa ila mismong kaugalingong habig.

Ang hagit gihimo ni Sr. Supt. Patrocinio Comendador ngadto sa mga kadagkuan sa mga fraternity ug gang kang kansang mga sakop -- kun pipila kanila -- nalambigit sa mga dugoong krimen.

Miawhag si Comendador nga ilang tabangan ang kapolisan sa paghipos niadtong mga badlongong sakop sa mga frat ug gang alang sa kalinaw ug isip paagi sa paglimpiyo sa ilang pangalan.

Ang hangyo kun awhag ni Comendador kun tumanon sa mga hingtungdang frat ug gang makatabang og dako sa pagpatunhay sa kalinaw sa Sugbu diin ning pila ka nanglabay nga mga adlaw gitay-og sa mga dugoong kalihukan sa mga badlongong fratmen ug gangmen.