Ang konstitusyon sa Pilipinas ang giisip nga usa sa labing maayo, lapad ug epektibong mitubag sa mga nag-unang panginahanglan sa mga Pilipino kung itandi sa ubang konstitusyon sa ubang nasud sa kalibutan. Apan adunay ubang probisyon sa balaod nga dili na epektibo ug wala nay maayong nahimo sa katawhan. Hinungdan nga matag karon ug unya, adunay mga lakang pag-usab ug pagbag-o sa pipila ka probisyon sa konstitusyon. Usa sa palpak nga balaod mao ang paghatag og gahum sa kabataan aron mamahimong lider sa nasud. Ang Sangguniang Kabataan ang giisip nga dalan aron mapadayag ug mapakita sa mga kabataan nga aduna silay igong gahum paghatag og maayong kausaban sa dagan sa kinabuhi ug panlantaw sa mga kabataang Pinoy.
Usa ko sa mga kabataan nga midagan pagka-konsehal sa unang piniliay sa SK. Angkunon nako, pildi ko sa maong eleksyon tungod kay wala ko mangampanya ug napugos lang ko pagpapili aron makompleto ang linya sa akong ig-agaw nga maoy nagpapili pagka SK chairman. Sa usa ka semana nga kampanya, usa ka adlaw lang ko miuban sa grupo ug wala gani ko magpahimo og campaign materials tungod kay alang sa usa ka kinse anyos nga bata, mas gipalabi pa nako ang magduwa kauban ang mga higala. Ang maong kalihukan maoy labing una nakong kasinatian sa politika sa nasud. Akong nahibaw-an nga dili diay sayon nga mosalmot sa bugtong lugaynon kung wala kay igong tinguha sa posisyon nga imong gidaganan. Labaw nang walay kapa-ingnan ang imong kandidatura kung sa maong pangidaron, imong makita nga namalit na og boto o pabor ang imong mga kauban ug kaatbang sa posisyon.
Ang SK ang maisip nga usa sa labing dakong palpak sa gobiyerno. Kung sa unang hugno sa maong kalihukan nagmalampuson ang pagdani ug pagpukaw sa interes sa kabataan pag-serbisyo sa isig nila ka kabataan, karon kwestyonable na kung anaa pa ba ang ilang seryosong tinguha. Kung kaniadto, mas lapad ang ilang plano nga makahatag og katagbawan pag-alagad sa kabataan, karon maihap nalang sa tudlo ang mga SK nga tinu-oray nga naglihok alang sa kaayohan sa katilingban. Kung kaniadto nahimong maayong panag-ingnan sa mga kabataan ang SK members, karon daghan na sa ilaha ang nalambigit sa nagkadaiyang kaso ug ilegal nga kalihukan.
Asa na ang SK karong nabutang sa dakong peligro ang kaugmaon sa kabataan? Asa na ang SK karong wala ug tuo ang krimen nga hatud sa nagkabikil nga mga fraternities? Asa na ang SK ning mga adlaw nga nag-unang su’d sa mga mantalaan ang mga bati nga panag-ingnan sa kabataan sama sa ilegal nga droga, pagpangawat, pagpanulis ug pagbaligya sa dungog? Asa ang SK ning panahon nga mas gikinahanglan ang ilang tabang ug presensya aron mamahimong inspirasyon ug paglaom sa bag-ong henerasyon?
Simple lang ang tubag. Sagad sa mga opisyal sa SK minyo na ug aduna nay pamilya. Nganong hatagan paman niya og dakong oras ang mga kabataan nga mismo siya aduna may kaugalingong bata nga buhosan sa iyang oras ug pagtagad. Adunay ubang sakop sa SK nga mibalhin na og laing lugar ug nagpadayon sa ilang pagtuon o nanrabaho na. Mobalik lang ba gyud siya sa iyang barangay aron lang mosalmot sa sesyon paghimo og mga kalihukan alang sa kabataan? Adunay mga opisyal sa SK nga nalambigit sa mga ilegal nga kalihukan ug karon anaa na likod sa rehas. Unsang kusog ug nawong paman ang ilang pwedeng ikapakita sa mga batan-on nga ila untang serbisyohan kung mismo sila labaw pang tabangunon tungod sa ilang kahimtang.
Pipila ka adlaw gikan karon, mamili na usab og bag-ong lider ang kabataan. Dili ko kombensidong ipadayon ang SK tungod kay sa tinud-anay lang, wala ni nahimo paghulma sa maayong ugma sa kabataan karon. Kung nagbaha ang mga responsableng SK, naglunop sab ang mga SK nga walay nahimo paghatag og kausaban sa dagan sa kinabuhi sa mga batan-on. Kung atong tan-awon, gihimo lang nga manok sa mga karaang politiko ang mga batan-ong buot mangulo sa ilang isig kabatan-on. Kung magpabiling ingon ini ang kahimtang sa mga bag-ong henerasyon sa lider, mas maayong susihon pagbalik ang probisyon sa balaod ug kung wala may maayong nahatag ang SK, mas maayong papason nalang ni ug magpaabot nalang ang kabataan sa panahon nga sila na ang mangulo sa nasud.