Walay purpose

Dunay mga hugon-hugon pagpapas sa Sangguniang Kabataan. Ang uban uyon nga wagtangon na lang ang SK kay wala man kini nahimo diha sa komunidad. Aduna usay supak sa pagwagtang niini kay dili kuno solusyon ang pagpapas sa usa ka sistema nga walay pulos kundili ang pagpangitag paagi aron kapahimuslan kini.

Tinuod man sab nga daghang mga SK officials nga walay nahimo sa batan-on nilang kakonstituwente. Didto lang sa among dapit, daghan kaayong SK chairman nga suweldo ray giapas. “Walay ikapaambit nga ideya kay walay alamag. Pero listo kaayong mokangkang ang kamot kun tingsuweldo na. Walay maayong performance.

Pero duna say ubang SK officials nga tinud-anay gyud nga nagserbisyo. Kugihan kaayo ug dako  nag agi sa ilang pagpangatungdanan. Anugon ang maong matang sa opisyal kun wagtangon ang SK. Pero mao lagi, ang maayong binuhatan sa pipila matabonan sa salawayong binuhatan sa daghang nagpabadlong. Mao nga unsa man? Angay bang wagtangon ang SK o dili?

* * *

Usa ka magbabasa ning lindog mi-text  nga nagkanayon: “Good day, Sir. Gusto lang kong mo-comment mahitungod sa mga SK chairman sa matag barangay. Wala man na silay purpose. Nag-apas lang na sila sa honorarium ug aron malibre sa eskuyla.” -- 0919-4456957 (Sent: 12:10:50pm-- September 25, 2007)

Makasimpatiya ko sa imong komento kay ako mismo nakaobserbar sab sa imong nasaksihan. Daghang SK officials nga personal nga interes ray gihikutar.

* * *

Sa laing bahin: “Good day, Sir. Grabe gyud makapaugat ang mga driver sa multicab ug jeep sa may gate 3 sa MEPZ 1, uy. Inigka alas 8 sa gabii anha na man sila mo-pick up og pasahero sa tunga sa karsada. Unya mo-u-turn anha lang gihapon sa gate 3. Paita gyung mga draybera. Mahasol ta kun naa ta sa ilang likod. Walay gamit ang mga polis ug CTMS kay di man kabadlong.”-- 0918-3239670 (02:49:21pm--Sept. 25, 2007).

Kun seryosohon sa proper authorities pagbadlong kanang abusadong mga driver diha. Masulbad kanang problemaha. Aksiyon!

 (Sumbong ug reklamo? Text sa 0910-8105522).