Kun mamuhi tag mga hayop, angay gyud natong seguroon nga limpiyo kanunay ang tangkal sa atong binuhi. Kinahanglan gyud nga ato kining buhaton aron dili kita makahatag og puwerhisyo ngadto sa atong mga silingan.
Usa ka magbabasa ning lindog mi-text nga nagkanayon: “Hello, Sir. Good day. Diri ba sa Sto. Niño 1, Bo. Luz tupad sa among boarding house kay naay nagbuhi og baboy. Unya dili man nila atimanon og limpiyo ang tangkal sa baboy. Inig-abli namo sa bentana grabe gyud ka baho sa hugaw sa mga baboy. Azon kunoy name sa tag-iya. Dili seguro maayo, Sir, nga magbuhi og baboy sa dapit nga sama anang lugara. Grabe gyud ka baho.” -- 0917-7464124 (Sent: 03:11:09pm--September 21, 2007)
Pakigsultihi ninyo ang tag-iya sa inyong boarding house. Tug-ani siya sa inyong yangungo. Hangyoa siya nga maoy makigsulti sa tag-iya sa mga baboy aron kapangitaan og alternatibong solusyon kanang kabaho nga inyong nasinati gumikan sa hugaw sa mga baboy nga wala malimpiyohi. Kun wala kamoy makitang kasulbaran niini, labing maayo nga mopadangat kamog reklamo ngadto sa mga opisyal sa barangay aron masusi kanang maong dapit ug masolusyonan ang problema.
Para nako, lehitimo ang inyong reklamo kay naglambigit man kini sa kahimsog sa panglawas. Tingalig magkasakit unya hinuon kamo kun kanunay na lang kamong makahanggap sa hangin nga nanimahong hugaw sa mga baboy.
* * *
Sa laing bahin: “Good day, Sir. Kana bang mga private vehicles sa mga parents sa mga estudyante sa USC Girls High. Magpataka man lang sila og U-turn. Unya magdoble to triple parking pa gyud sa atubangan sa maong school. Maka-cause ra ba og traffic. Malangay ug ma-late ming mga workers nga mag-commute sa O6G nga rota. Alas 7 ra ba ang among duty. Maayo unta kun naay CITOM ug LTO ba kaha nga mo-facilitate sa traffic diha.” -- 0921-4874281 (Sent:08:35:37pm--September 21, 2007)
Manghinaot tang makaabot ngadto sa kasayoran sa proper authorities kining gipahungaw nimong reklamo ug makakita silag alternatibong solusyon sa paghuot sa trapiko diha sa may USC Girls High dapit.
(Sumbong ug reklamo? Text sa 0910-8105522).