EDITORYAL – Lutasin ang mga kaso nang paglabag sa karapatang pantao

HALOS pumantay na sa Marcos regime ang mga kaso nang paglabag sa karapatang pantao na naganap sa Arroyo administration. Mula January 2001 na naupo si President Arroyo, daang katao na ang napatay at parang bula na nawala. At ang pinag­hihi­ nalaang may kagagawan ay ang military. Pero sa kabila nang mga nangyayaring ito, tila patay-malisya ang  Arroyo administration. At ang matindi, sinabi pa ni Mrs. Arroyo nang magsalita sa United Nations General Assembly noong nakaraang linggo na hindi niya ito-tole­rate ang mga paglabag sa karapatang pantao. Kulang na lamang niyang sabi­hin na walang nangyayaring paglabag sa kara­patang pantao sa Pilipinas.

Maraming napakunot-noo sa pahayag ng Presi­den-te sapagkat mula nang maupo siya sa puwesto, tinatayang nasa 800 biktima na ng paglabag sa karapatang pantao. Bukod pa riyan ay marami pa ang nawawala. Kabilang sa mga nawawala ay ang anak ng late journalist na si Joe Burgos na si Jonas. Dinu­kot si Jonas sa isang mall sa Quezon City ng mga hinihi­nalang military. Isang taon na ang nakararaan, dala­wang babaing estudyante ng University of the Philippines ang dinukot. Hanggang ngayon, hindi malaman kung nasaan si Jonas at dalawang estud­yante. Sila ay ilan lamang sa daang biktima ng pagla­bag sa kara­patang pantao.

Nang magsalita sa UN General Assembly, mariin din namang kinondena ni Mrs. Arroyo ang pagsikil ng Burma sa mamamayan nito. Walang demokrasya sa Burma at lantaran kung patayin ang mga luma­laban sa gobyerno na pinamumunuan ng military junta. Hiniling ni Mrs. Arroyo na pawalan ang lider na si Aung Yun Suukyi at iimplement ang democratic reform.

Kakatwa talaga si Mrs. Arroyo sapagkat nakikita  niya ang ibang lumalabag sa karapatang pantao suba-lit sa mismong pinamumunuan niya ay hindi naman niya malutas ang mga problema ng mga pagpatay at pagkawala na ang itinuturong may kaga­gawan ay mga sundalo. Walang ipinagkaiba noong martial law na maraming namatay at nawala. Ganyan ba ang hindi papayagan ang paglabag sa karapatang pantao?

Marami nang foreign observer ang nagtungo sa bansa at sinusuri nila ang mga nagaganap na pag­labag sa karapatang pantao rito. At lumabas sa kani­lang pagsusuri na nagsisinungaling ang military sa mga tunay na nangyayari. Kulang na lamang sabihin na ang military ang nasa likod ng mga sunud-sunod na pagpatay at pagkawala ng mga lider manggaga­wa, estudyante, miyembro ng media at iba pa. Idi­nagdag pa ng mga observer na hindi nababawasan ang mga kaso kundi nadadagdagan pa.

Nakikita ni Mrs. Arroyo ang human rights violation sa ibang bansa subalit sa kanyang pinamumunuan ay hindi naman niya makita.