Bahin sa budol-budol

Hisgotan na usab nato ang bahin sa Budol-budol Gang. Kinahanglan nga sa makausa pa, pahinumdoman na usab nato ang atong kaigsuonan mahitungod sa modus operandi ning maong grupo ilabi na karon nga milihok na usab sila aron pagpamiktima sa mga tawong nagtinarong. May gikataho na usab nga nailad ning maong grupo busa subli natong pahimatngonan ang katawhan kalabot sa estilo sa ilang modus aron makabantay ang tanan.

* * *

Usa ka magbabasa ning lindog mi-text nga nagkanayon: "Good AM, Sir. Duna lang koy i-share bahin nianang Budol-budol gang. Ang ilang taktika sa pagpangilad mao nga magpatabang sila sa gusto nilang biktimahon. Kun babaye ang ilang biktimahon, babaye pod ang modiskarte. Unya moduol dayon ang kauban nga lalaki. Wa lang ta masayod nga kunsabo diay tong duha. Pagbantay mo kay nabiktima na ko niana. Nakuhaan kog Chinese gold necklace ug ariyos." - - 0910-9459346

* * *

Hinaot nga ang kasinatian sa atong texter makahatag ninyog pudyot sa pagtulun-an ug makabaton kamog ideya unsaon paglikay sa mga mangingilad nga sakop sa Budol-budol gang. Kun ugaling adunay lalaki o babaye nga dili ninyo kaila nga moduol kaninyo aron magpatabang, ayaw mog kompiyansa kay tingalig budol-budol na kana. May maayong dili ninyo tubayan ang ilang gisulti aron dili kamo madani. Maayo man god modalag estorya kining mga tawhana. Hayloon ka og kuwarta bugti sa imong pagtabang (kunohay)  nila. Himanhiman pa, ikaw ang maalkanse.

* * *

Sa laing bahin: "Palihog kog dakol nianang mga parking aid sa Cebu City. Magbayad pa tag parking fee unya naa pa pod silay kauban nga watch your car. Doble na ang among bayad. Grabe  na man pod, uy." -- 0905-2440751 (Sent: 07:42:37 am -- September 20, 2007)

Ayaw mo palabi, Dong, uy. Siyaro na man sab kun dili mo maikog!

* * *

Hangyoon nako ang tanan mo-interact dinhi sa akong lindog nga palihog klaroha ang detalye sa inyong text. Dunay ubang text nga nindot untang komentaryohan pero magpanagana ko kay dili klaro ang detalye. Lisod nag masipyat ta.

(Sumbong ug reklamo?Text sa 0910-8105522)