Ang lotus ni Radaza

Gisugdan na og gukod ni Mayor Boy Radaza si Efrain Pelaez ug ang mga negosyo niini. Kaniadtong miaging semana gipadad-an sa siyudad sa LapuLapu og pagpahibalo ang mga tenant ni Pelaez sa iyang Marina Mall ug gipangayoan og mga pagpasabot kun nganong dili bakwion ang mga business permit niini tungod sa pagbutang og negosyo sa Marina Mall nga walay building permit.

Ang  pagka maginukdanon sa pangagamhanan ni Mayor Boy Radaza diha sa LapuLapu naklaro na. Sa ilang bangi ni Efrain Pelaez nga mipasaka kaniya og kasong graft and corruption tungod sa pagpamalit og pastilang mahalang mga computer units, gidamay niya ang mga way labot.

Kung natinun-an ko pa ni si Radaza ug ang iyang mga alipores dugay ra ning nahagbong kay dili responsive sa ilang tubag. Sayonan mo, dihang gipasanginlan nga nagpaburot sa presyo sa mga computer units nga iyang gipamalit alang sa mga pampublikong tunghaan diha sa iyang siyudad, ang iyang tubag - self-centered kuno si Pelaez ug tax evader. Naunsa ka Mayor? Asa ugod tawon ka paingon ning imong tinubagan nga imong gipaagi sa imong mga alipores.

Si Efrain Pelaez maoy nagpasaka niya og kasong graft and corruption pero gidamay ang mga way labot.

Ang labing dakong kasalawayon ni Mayor Boy Radaza ug mga alipores mao ang ilang rason kun nganong ilang papahawaon ang mga tenant ni Pelaez sa iyang Marina Mall, kay nagbutang daw kuno kini og negosyo sa edipisyo nga walay building permit. Porbida Mayor, Pagkadugay na nianang Marina Mall nga nagtungkawo sa imong ilong wa gayod ka kahibalo niana nga wa diay kanay building permit? Pagkalooy sa mga Oponganon nga nakamayor og “tanga”. Unsa bay pagtoo nimo mayor ning Marina Mall ni Pelaez “tongaw” kay di makita ug masulod lang sa bulsa?

Karon nga nakaamgo kana sa imong katanga, ang mga tenant na sa Mall ang imong pakasad-on? Nganong dili man ang imong Office of the Building Official ang imong paninglan og dokdokon sa pagkatukod nianang Marina Mall nga wa diay building permit? Nganong dili man ang taga OBO maoy imong pahatagon og pagpasabot sa pagkatukod sa Marina Mall? Kanus-a kaha ka mataohi mayor? Pagkatoytoy!

* * *

Super GER, kun si Erap may plunder, Mike Arroyo may Broadband deal, si Ben Abalos may ZTE deal, kana Radaza may lampost deal plus compu deal = Lapu-Lapu City deal. 09164468733