Morag dayag na tingali kaayo ang sugal diha sa Dumlog, Talisay city kay daghan na man gyod ang mipadangat nakog reklamo kalabot nianang maong kalihokan. Ang uban gani gustong rondahon na kana sa mga tinugyanan sa balaod. Siyaro na man sab kun wala gyoy nakabadlong nianang maong aktibidad?
Usa ka magbabasa niining lindog mi-text nga nagkanayon: "Good day, Sir. Moreklamo unta ko bahin sa grabeng paghitak sa sugal diha sa Dumlog, Talisay. Binuntagay man gyod. Maayo untag iparonda na sa mga polis, Sir. Thanks." -- 0926-3508361 (Sent; 01:24:40 pm--September 1, 2007)
* * *
Una sa tanan, atong sangpiton ang atensiyon sa mga opisyal sa barangay Dumlog sa pagsubay niining maong reklamo. Basin wala pa kamoy kasayoran nga naghitak diay ang sugal diha sa inyong dapit. Sumala sa taho, magbinuntagay gyod ang sugal diha. Ipasubay kini sa inyong mga tanod. Ug kun mamatud-an nga tinuod kining reklamo nga gipadangat dinhi kanato, himoi ninyo kanag tukmang aksiyon. Sangpit mo sa kapolisan kun magmagahi ang tigpasiugda sa sugal.
Ang inyong aksiyon gikinahanglan sa mga reklamante!
* * *
Nagbagulbol ang mga ginikanan nga nagpatungha sa San Roque High School sa San Roque Mabini, Bohol tungod sa sobrang mga project nga gipangayo sa mga magtutudlo sa maong tulunghaan ngadto sa ilang mga estudyante. Daghan kaayong projects. Gawas nga gastoso, dili na mahinultol sa pagtuon ang mga tinun-an kay ang ilang panahon gigugol na man hinuon paghimo sa ilang projects. Ang materials nga gamiton sa project adto ra sab ipapalit sa mga tindahan nga gipanag-iya sa pipila ka magtutudlo.
Dili ko gustong motuo niining maong kasayoran pero wala sab koy nakitang rason nga magtumo-tumo og sulti ang mga ginikanan. Pero in fairness ngadto sa mga magtutudlo sa San Roque High School, ato silang hatagan og higayon pagpasabot sa ilang habig. Bukas kining akong lindog alang sa inyong pagpatin-aw, Sir, Ma'am. Tulibagbag ra ba gyod kaayong pamation kun tinuod man ang alegasyon sa mga ginikanan batok ninyo.
(Sumbong ug reklamo? Text sa 0910-8105522)