Ang plano sa pag-organisar og Parents Brigade, usa ka lakang batok sa problemang mugna sa mga notoryus nga fraternity ug gang, gihangop sa mga ginikanan kinsa nabalaka sa kaluwasan sa ilang mga anak.
Ang maong plano gipadayag dili pa dugay ni Konsehal Gerry Carillo, tsirman sa Committee on Education sa Konseho.
Matud ni Carillo ang iyang nahunahunaan nga Parents Brigade makatabang og dako sa pagsulbad sa problema diin ang mga batang tinun-an nahimutang sa kakuyaw tungod niining mga badlongong sakop sa pipila ka mga fraternity ug gang.
Ang maong plano ni Carillo gisuportahan ni Mayor Tomas Osmeña kinsa mipasalig nga mohatag og igong suportang pinansiyal ingon man mobile assistance nga mohimog roving sa nagkadaiyang tunghaan.
Manghinaut kita nga mahinayon kining proyekto nga nahunahunaan ni Konsehal Carillo ug dawaton sa dakong paghangop sa atong komunidad.